Print this page

Lere Kontinua ho FRETILIN 1975, ‘Lakohi’ FRETILIN 2000

By August 20, 2022 2865
Tanente Jenerál Reformadu Lere Anan Timur. Tanente Jenerál Reformadu Lere Anan Timur. Foto Suplay

Tempotimor (Vemase)-Tanente Jenerál Reformadu Lere Anan Timur, deklara nia parte kontinua inklina-an Partidu FRETILIN ne’ebé hahu moris iha tinan 1975, hanesan mós Fundadór ida no lakohi hamutuk ho FRETILIN ne’ebé foin moris iha tinan 2000.

“Ha'u sempre prontu tanba FRETILIN ha'u-nian, la'ós ema seluk nian. Marí Alkatiri fundadór ha'u mós fundadór partidu, anaunser partidu FRETILIN 2000 ne'e oin seluk, ne'e ha'u la tama ona, entaun husik ba Marí nian Lú Olo nian imi tama ba, ha'u naran servisu hamutuk ho ha'u nia maluk sira rezisténsia ne'ebé uluk ami funu hamutuk, ha'u-nia maun Taur, ha'u-nia maun Xanana ba interese nasaun nian”, deklara Tenente Jenerál Reformadu Lere Anan Timur ba jornalista sira hafoin partisipa iha semináriu nasionál kona-ba tinan 47 Falintíl nian ne’ebé realiza iha Vemase, sesta (19/08).

Bainhira ko’alia kona-ba Estututu Partidu FRETILIN ne’ebé taka dalan ba Tanente Jenerál Reformadu Lere Anan Timur hodi kandidata-an ba Prezidente Fretilin, mak nia konsidera FRETILIN atuál la’ós Fretilin 1975 to’o 1999, maibé ne’ebé foin mosu iha tinan 2000.

“Sira ko'alia kona-ba estatutu, estatutu FRETILIN ninian ne'e so tinan lima mak bele fó dalan para ha’u bele kandidata-an, entaun ha'u dehan ok, ha'u FRETILIN husi tinan 1975 membru komité sentrál iha tinan 1981 to'o tinan 1999 to'o agora seidauk iha kongresu ida ke ezonera ha'u ka disolve komité sentrál ne'ebé ke uluk ami hari’i, tanba ita dehan FRETILIN partidu la'ós foin mak hari’i, Maun Xanana hamutuk ami na'in-sia ho Saudozu Mauhunu ami hari’i iha loron tolu fulan-marsu 1981 partidu Marxista Leninista FRETILIN”, deklara Lere.

Tanba ne’e husu ona ba Sekretáriu Jerál Fretilin, Marí Alkatiri atu deklara ba públiku katak, konferénsia Maubani la vale, maibé to’o agora laiha resposta.

“Ha’u hatete ba maun Marí atu halo komunikasaun públika ofisiál katak, Konferénsia Maubani la vale, brani ne'e ko'alia ida-ne'e, labele nonok tanba agora úniku sobrevivente ami na'in-rua maun Xanana, mais nia ba ona CNRT, nia aman ba FRETILIN nafatin ema ida labele nega ida-ne’e, Maubani ne'e agora ha'u mesak ne'e mak Membu Komité Sentrál FRETILIN, ne'e mak ha'u husu ba maun Marí hatete loloos, deklara ba públiku katak konferénsia Maubani loron 03 fulan-marsu ne’e lavale, ne'e ema hatene ka la’e?. Ne’e mak halo kole ema, tanba uluk ha’u Jenerál mós Fretilin, agora mós Fretilin nafatin”, hatete nia.

Membru sobrevivente CCF ne’e afirma, prontu servisu hamutuk ho Prezidente Partidu Kongresu Nasionál Rekonstrusaun Timor (CNRT), Kay Rala Xanana Gusmão no Prezidente Partidu Libertasaun Popular (PLP), Taur Matan Ruak.

“Ha'u serbisu hamutuk ho ha'u-nia maun Taur la siknifika, ha'u ba partidu PLP, ha'u serbisu hamutuk ho ha'u-nia maun Xanana la siknifika, ha'u ba CNRT, mais tanba ami uluk funu objetivu ida de'it ukun rasik-an atu lori di'ak ba ita-nia povu no lori di'ak ba ita-nia nasaun, ida-ne'e mak iha ami-nia fuan ba interese nasionál nian la'ós ba interese pozisaun”, deklara Lere.

Enkuantu iha informasaun katak, deputadu Fretilin iha Parlamentu Nasionál, José Agostinho Siqueira ‘Somotxo Matar Mimiraka’ entrega ona nia fatin ba Jenerál Reformadu Lere Anan Timur hodi forma pakote ho Rui Maria Araújo iha kongresu partidu FRETILIN ne'ebé sei realiza iha loron 08-10 fulan-setembru 2022.

“Ida-ne'e tanba kestaun de ierarkia e konsiderasaun Somotxo ha'u-nia subalterno eh nia hatene katak ha'u sai ona, ha'u labele hanesan ne'e de'it, ha'u tenke okupa kargu ruma. Entaun nia fó nia fatin ne'e ba ha'u, maibé ha'u seidauk ko'alia ho nia katak ha'u hakarak mas, konsiderasaun de'it la'ós katak atu forma pakote ho Rui Araújo, mais uluk ne'e nia mak atu forma pakote ho Rui Araújo”, hatete Lere. (*)

Rate this item
(3 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items