Print this page

Xanana Simu Orientasaun Horta Reprezenta Estadu ba Vatikanu

Prezidente Repúblika (PR), José Ramos Horta dada lia hela ho Prezidente Partidu Congresso Nacional de Reconstrução de Timor (CNRT), Kay Rala Xanana Gusmão. Prezidente Repúblika (PR), José Ramos Horta dada lia hela ho Prezidente Partidu Congresso Nacional de Reconstrução de Timor (CNRT), Kay Rala Xanana Gusmão. Foto Suplay

Tempotimor (Dili)-Prezidente Partidu Congresso Nacional de Reconstrução de Timor (CNRT), Kay Rala Xanana Gusmão iha loron kinta (18/08) hala'o enkontru ho Prezidente Repúblika (PR), José Ramos Horta hodi simu orientasaun atu reprezenta Estadu Timor-Leste ba partisipa serimónia Kardeál foun Dom Virgilio do Carmo da Silva inklui hala'o reuniaun ida ho amu Papa Francisco iha Vatikanu.

“Ita-boot sira hatene katak sua eselénsia Prezidente hatudu atan-oan atu reprezenta nia iha Vatikanu, bainhira Dom Virgílio sa'e ba Kardeál. Ida-ne'e mak ohin ami ko'alia”, dehan Xanana hafoin enkontru ho PR Horta iha Palásiu Prezidensial Bairo Pite, kinta (18/08).

Ho orientasaun ne'ebé Xefe Estadu delega ba Xanana Gusmão tanba iha serimónia investidura ba Kardeál foun ne'e inklui mós Arkebispu Dom Virgílio do Carmo da Silva.

Tanba ne'e, Prezidente Repúblika nomeia Xanana atu reprezentate Estadu Timor-Leste iha Vatikanu, bainhira Dom Virgílio do Carmo da Silva, SDB simu posse ba Kardeál.

Nune'e mós sei hasoru malu ho Papa Francisco, hodi hato’o sentidu agradesimentu husi Estadu Timor-Leste nian ba Papa Francisco, tanba konsidera Timor-Leste nia Arsebispu ida sai mós Kardiál.

“Iha Roma enkontru ho Amu Papa, tanba ne’e ha’u la ba ho ha’u-nia naran rasik, maibé hanesan reprezentate Xefe Estadu no Estadu Timor-Leste hodi agradese ba Papa ne’ebé hili ona Arsebispu Virgílio do Carmo da Silva nu’udár Kardeál primeiru Timor nian”, hatete Xanana.

Durante enkontru Prezidente Repúblika mós fó hatene ba Xanana, atu aprezenta ba Amu Papa katak iha Timor-Leste laiha problema entre relijiaun tanba Timor-Leste rasik hahú promove no konsolida fraternidade umana.

Primeiru Ministru (PM), Taur Matan Ruak hatete, dadaun delegasaun husi Governu ne'ebé atu partisipa iha serimónia tomada Pose ba Kardeál foun iha Roma, mak Ministru Prezidensia Konsellu Ministru (MPKM), Fidelis Leite Magalhães, ho Ministru Turizmu Komérsiu Industria (MTKI), José Lucas do Carmo da Silva.

“Dadaun ne'e delegasaun ne'ebé partisipa iha serimónia mak, delega husi Ministru Prezidénsia Konsellu Ministru, Fidelis Leite Magalhães, purtantu nia ho tán Ministru Turizmu Komérsiu Industria (MTKI), José Lucas do Carmo da Silva”, afirma nia. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items