“Ho konsiderasaun ba tomada pose titulár foun ida Ministériu Obras Públikas nian, objetivu mak atu halo alterasaun sira ne’ebé presiza hodi organiza filafali servisu balun ne’ebé inklui iha Ministériu, atu fó efisiénsia boot liután iha ezekusaun ba ninia atribuisaun sira”, dehan Ministru Prezidénsia Konsellu Ministru (MPKM), Fidelis Leite Magalhães iha Palásiu Governu, kuarta (17/08).
Ho nune’e, halo divizaun ba Diresaun Jerál Administrasaun no Finansas ba diresaun rua ho vokasaun ne’ebé la hanesan.
“Ida haree liu ba ezekusaun orsamentál ne’ebé inklui Diresaun Nasionál Aprovizionamentu no Orsamentu no Finansas, iha ne’ebé inklui mós Unidade Planeamentu Estratéjiku, ne’ebé ba oin sei sai hanesan diresaun nasionál. Seluk haree liu ba kestaun administrasaun jerál rekursu sira iha Ministériu, iha ne’ebé inklui Diresaun Nasionál Administrasaun no Jestaun Patrimóniu no Rekursu Umanu, aumenta mós Diresaun Nasionál Teknolojia Informasaun nian, ne’ebé hakarak atu fó suporte apoiu ba dijitalizasaun serbisu iha Ministériu”, hatete nia.
Nune'e mós hasai diresaun Jerál sira ne’ebé hakotu tiha ona ho nomeasaun ba órgaun diretivu empreza públika, Bee Timor-Leste, E.P. no Eletrisidade de Timor-Leste, E.P.
Diresaun Nasionál Estrada, Ponte no Kontrolu ba Inundasaun fahe mós ba diresaun nasionál rua; ida haree liu ba estrada no ida seluk haree ba prevensaun no kontrolu ba bee-sa’e hodi nune’e Ministériu bele iha entidade ida ho kompeténsia espesífika hodi hamenus risku inundasaun ne’ebé akontese hela ba beibeik, tanba alterasaun klimátika sira. (*)