Iha serimónia ne'e hetan partisipasaun husi Prezidente Repúblika (PR), José Ramos Horta, nomós Ministra Negósiu Estranjeiru no Kooperasaun (MNEK), Adalijza Albertina Xavier Reis Magno ho membru Governu sira seluk nomós korpu diplomátiku iha Embaixada Royal Thailand iha Dili.
Durante iha serimónia refere, Embaixadór Tailándia nian mai Timor-Leste no Dean ba Misaun ba ASEAN nian, iha Dili, Ekapol Poolpitat, hato'o parabéns ba Governu no povu Timor-Leste iha okaziaun aniversáriu Restaurasaun Independénsia Timor-Leste nian ba dala 20.
“Nia hahí Timor-Leste nia susesu sira iha hari’i Estadu ida-ne'ebé forte no reziliente no promove pás no dezenvolvimentu sustentavel”, deklara Kmunikadu Imprensa ne'ebé www.tempotimor.com asesu husi gabinete Prezidente Repúblika, José Ramos Horta, segunda (15/08).
Ba selebrasaun ejisténsia ASEAN ba tinan-55 ne'e, Embaixadór Poolpipat ko'alia liu kona-ba susesu sira ne'ebé hetan husi konsekuénsia ida-ne'ebé koesivu ASEAN nian iha pandemia ne'e nia-laran.
Nune'e hato'o nia benvindu ba missaun sira ne'ebé hala'o ho susesu husi Komunidade Sosiu-Kulturál ASEAN nian (ASCC) no Komunidade Ekonomika ASEAN nian (AEC) ne'ebé hala'o iha Jullu 2022 nomós Komunidade Politiku-Seguransa ASEAN nian (APSC) ne'ebé hala'o iha Setembru 2019.
Tanba ne'e, ASEAN komprometidu nafatin atu kontinua esplora dalan sira atu fornese asisténsia kapasitasaun no fasilita Timor-Leste iha ninia preparasaun adezaun ba ASEAN.
Prezidente Repúblika, José Ramos Horta mós kongratula ASEAN l ninia susesu sira iha ninia istória durante tinan 55 no ninia papél iha promosaun pás no estabilidade rejionál sira.
“Nia hato'o ninia apresiasaun ba ASEAN ba ninia apoiu ba prosesu kapasitasaun Timor-Leste nian no hein ba rezultadu pozitivu husi avaliasaun ba Timor-Leste nia prontu-an atu tama ba ASEAN”, deklara iha komunikadu Imprensa ne'e.
Serimónia ne'e remata ho show ida kona-ba diversidade kulturál ASEAN nian iha dapur oioin iha ASEAN nia laran ne'ebé prepara husi Embaixada Estadu Membru ASEAN sira iha Dili.
Purtantu ejisténsia ASEAN ne'e hanesan organizasaun intergovernamentál ne'ebé hari’i iha loron 8 Agostu 1967 liuhusi asinatura Deklarasaun Istóriku Bangkok nian husi Ministru Estranjeiru sira husi Estadu-Membru Fundadór lima, hanesan Indonézia, Malázia, Filipina, Singapura no Tailándia.
Iha tinan barak nia laran, membru ASEAN sira-ne'e sai barak liu ona, inklui Brunei Darussalam, Vietnam, Laos PDR, Mianmar, no Kambodia.
Husi grupu ki'ik ida husi nasaun Sudeste Aziatiku sira, ASEAN evolve ona ba komunidade ida-ne'ebé bazeia ba regra sira ne'ebé hala'o papél xave ida iha promosaun pás no estabilidade rejionál, prosperidade no dezenvolvimentu, enkuadra iha pilár tolu husi Komunidade ASEAN: APSC, AEC, no ASC.
Tema ba ASEAN iha tinan 2022 ne'ebé lidera Kambodia mak "ASEAN ACT Responde ba Dezafiu sira Hamutuk," ne'ebé subliña importánsia husi espíritu ASEAN nian nu'udar família ida-ne'ebé unidu ba na'in-sanulu, ho sentidu forte kona-ba tentativa atu responde ba dezafiu komún sira no atinje meta sira ne'ebé fahe ona. (*)
