Tuir informasaun ne’ebé www.tempotimor.com, asesu iha pájina TIC Timor, sábadu (13/08) katak, enkontru ne’e, ho objetivu husi enkontru ne’e, tanba ekipa DG-PARM husu atu TIC TIMOR fó apoiu estabelese Dijitalizasaun Dadus no Informasaun iha Diresaun Jerál Peskas, Aquikultura no Rekursu Marinu (DG-PARM).
MAP husu apoiu ne’e tanba agora dadaun Diresaun Jeral Peskas, Aquikultura no Rekursu Marinu (DG-PARM) liliu iha Diresaun Nasionál Inspesaun Peskas no Rekursu Aquátiku (DNIPRA) hala’o hela atividade rejistu Ró Peska komersiál no Ró Peska Non-Komersiál iha teritóriu Timor-Leste nomós halo hela Inspesaun, Verifikasaun no Monitorizasaun ba servisu hotu relasiona ho Movimentasaun ba Ró Peska ho nia produtu ne’ebé mai iha rai laran.
Dadus no informasaun refere arkiva ho sistema Manuál ka Konvensionál tanba ne’e sira presiza tebes apoiu husi Tekníku TIC TIMOR nian atu arkiva Dadus no informasaun hirak ne’e ho dijitál.
Bainhira hala’o enkontru Software Developer Officer, Sarmento Tong informa, Tekníku DSA ninia servisu atu Kria Website no Dezenvolve Sistema Aplikasaun ba Instituisaun Estadu sira hotu tuir pedidu ne’ebé sira husu, Instituisaun Estadu barak ona mak utiliza sistema ne’ebé tekníku TIC TIMOR Dezenvolve.
Iha enkontru ne’e Xefe Departamentu Supervizaun Jestaun Rekursu Marinu-MAP, Pedro A. Maria Rodrigues hatete, sira-nia ekipa presiza tebes atu adopta-an ba sistema liliu teknolojia tanba ne’e sira-nia parte agradese tebes ba TIC TIMOR bele atende pedidu ne’ebé sira hato’o.
Iha ne’e halo aprezentasaun kona-ba sistema ne’ebé antes ne’e ekipa Diresaun Jerál Peskas, Aquikultura no Rekursu Marinu (DG-PARM) kria ba tekníku TIC TIMOR nian. (*)