Diretór Ezekutivu Fundasaun Mahein (FM), Abel Amaral hatete, iha loron 20 Agostu 2022 sei selebra loron FALINTIL ba dala 47, maibé dezemvolvimentu ho infraestrutura ne’e ladún la’o di’ak, tanba  Governu la tau atensaun ba fasilidade ho ekipamentu operasaun liliu iha tasi.

“Durante ne’e Governu dezenvolve no hadi’a ona infraestrutura sira iha F-FDTL, maibé seidauk másimu, ami haree fasilidade ne’e sei menus liuliu iha komponente Navál to’o agora laiha  ró no parseiru sira ne'ebé  durante ne’e apoiu mós avaria aat hotu ona”, dehan Abel iha kna’ar fatin, Bairu Sentrál, kinta (11/08).

Tanba Forsa ne’ebé koloka iha komponente navál atu halao nian papel ida importante atu asegura rikosoin iha tasi, maibé sira la bele ezerse sira-nian kna’ar ida-ne’e iha tasi, tanba fasilidade ró laiha.

“Ami rekomenda ba Ministériu Defeza ba Estadu atu tau atensaun ba servisu navál nian, tanba servisu navál ne’e la’ós servisu hanesan iha terreste, sira presiza ró neebé iha kondisaun di’ak, atu uza ba operasaun iha kosta súl atu kontrola rikusoin Timor-Leste nian iha tasi”, afirma nia.

Tanba ne’e, fasilidade no dezenvolvimentu infraestrutura iha Instituisaun F-FDTL, asuntu importante, tanba fasilidade iha komponente sira hotu liuliu transporte karreta rasik mós sei limitadu, bainhira halo atividade ruma atu tula Militar sira la to’o.

“Iha oportunidade ida-ne’e, ami rekomenda ba Governu kada tinan tenke investe fasilidade tuir nesesidade F-FDTL atu adapta ho polítika rejionál, nune’e ita-nia forsa mós hamrik ne’e katak, ita mós nasaun ida”, hatete nia.

Antes ne’e, Komandu Falintil-Forsa Defeza Timor-Leste (F-FDTL), husi Komponente Navál halo ona desmantelasaun ba ró RNTL kamanasa ne’ebé oferese husi Governu Korea iha tinan 2011 dadaun ne’e kondisaun aat ona labele halo operasaun.

Komandante Komponente Navál, Kapitaun Mar e Guerra Higino da Neves hatete, ró RNTL Kamanasa, komandu deside halo desmantela entrega hikas ba patrimoniu estadu, tanba kondisaun ró aat ona.

“Ró RNTL ne’e iha tinan 2011 oferese husi Governu Korea ba ita atu entrega ba komponente navál halo misaun patroilla iha tasi, maibé ró ne’e fó mai nia kondisaun aat ita lakonsege halo operasaun agora ita deside entrega Hikas ba patrimóniu estadu”, dehan nia. (*)