Iha atividade Naroman ba Suku ne'e rasik prevee iha ona programa MAPKOMS nian ne'ebé hanaran "Governu iha povu nia leet" no nia prinsípiu mak atu diálogu ho komunidade atu rona preokupasaun, sujestaun, inklui buka hatene saida mak komunidade sira iha no saida mak sira laiha.
“Tanba ne'e MAPKOMS nia programa ne'ebé importante mak Governu tenke iha komunidade sira-nia leet, liu husi diálogu”, dehan Ministru Francisco Martins da Costa Pereira Jeronimo hafoin diálogu ho komunidade iha Suku Bubususu, sábadu (06/08).
Tanba objetivu prinsipál husi Governu ba dezenvolvimentu rai ida-ne'e mak ema no ema mak sai sentru ba dezenvolvimentu Nasionál ho nune'e Governu hakarak hasai povu ida ne'e husi izolamentu.
Nune'e diálogu ida-ne'e bele mós hari’i sentru ba informasaun iha suku, atu nune'e suku bele hetan informasaun oinsá mak bele sai husi izolamentu.
Xefe Suku Bubususu, Estanislao Borges hatete, nia parte sente haksolok no lori komunidade Suku Bubususu nia naran hato'o benvindu ba vizita husi MAPKOMS inklui Membru Governu sira tanba foin ba dahuluk mai vizita suku refere.
Iha atividade diálogu komunitária ''naroman ba suku'' ne'e hetan partisipa husi reprezentante Ministériu administrasaun estatál, Solidariedade, Saúde, SEKOOP, Administradór no Komandante PNTL Munisipiu Manufahi, autoridade lokál inklui komunidade sira. (*)