Tuir informasaun ne’ebé www.tempotimor.com, asesu iha pájina Parlamentu Nasionál, kuarta (03/08) katak, ho lansamentu ne’ebé sei hala’o mak ekipa Diresaun Jerál Estatístika ne’ebé lidera husi Diretór Elias dos Santos Ferreira hanesan mós Prezidente Komisaun Tékniku Sensu 2022, hamutuk ho ekipa RTTL halo gravasaun vídeu Mensajen husi Prezidente Parlamentu Nasionál, Aniceto Longuinhos Guterres Lopes.
Vídeu Mensajen ne’e nia objetivu mak atu enkoraja sidadaun Timoroan sira hodi partisipa iha atividade nasionál Sensu Populasaun no Uma-ka’in 2022 ne’ebé sei realiza iha loron 4 fulan-setembru to’o loron 5 fulan-outubru iha territóriu Timor laran tomak.
Ba atividade gravasaun vídiu Mensajen ne’e sei halo mós ho Prezidente Repúblika, José Ramos Horta, Primeiru Ministru, Taur matan Ruak, nu'udar Prezidente Komisaun Nasionál Sensu Populasaun no Uma-ka’in 2022, Ministru Finansas nu’udar Vise-Prezidente Komisaun Nasionál, Arsebispu Arkidioseze Metropolitana Díli no entidade sira relevante.
Tanba atividade nasionál kada tinan lima ne’e mak ba dahaat iha istória Timor-Leste depoisde Governu anteriór sira realiza ona iha tinan 2004, 2010 no 2015.
Iha OJE 2022, Governu aloka orsamentu millaun $3,1 hodi apoiu atividade nasionál ne’e. Aleinde ne’e, Governu mós hetan apoiu orsamentu adisionál husi UNFPA $777,3 mil, UNICEF $56 mil, UNDP $25 mil, UN Women $24 mil no WFP $20 mil. Totál orsamentu hamutuk millaun $4,1. (*)