Tuir informasaun ne’ebé www.tempotimor.com, asesu husi Mídia Palasiu Preziddénsia, sesta (05/08) katak, ekipa mídia PR husu deskulpa, tanba situasaun mak la permite atubele lori jornalista iha vizita munisípiu rua.
“Olá b.noite ba kolega Jornalista Mídia Imprime no Eletrónika sira hotu ne’ebé destaka iha Pálasiu Prezidente. Ami ekipa Mídia PR husu deskulpa ba belun sira hotu atubele koopera no intende ami-nia situasaun hodi ami partilla informasaun ne'e tarde oituan to’o kalan boot ida-ne’e’, dekklara mídia PR ba Jornalista destakadu husi mídia sira.
Ekipa mídia mós informa ba jornalista hotu katak, tuir ajenda ne’ebé Prezidente Repúblika, José Ramos-Horta, hala'o viajen ba Munisípiu Manufahi no Ainaro, hafoin fila mai Dili iha loron sábadu (06.08).
Atu akompaña viajen ne'e, ekipa Mídia PR aprezenta duni pedidu normál atu lori mós mídia sira hodi akompaña, maibé dezde pedidu refere la hetan aprovasaun husi responsavel sira iha Palásiu Prezidente, tanba ne’e labele lori jornalista sira.
“Ami konsidera situasaun ne'e ida difísil ba ami no belun sira hotu, mezmu ami halo esforsu atu lori belun sira, maibé la hetan dalan. Ami rasik deside sei ba ho inisativa ami-nian rasik atu akompaña no asegura atividade na’i-Prezidente nian hanesan ofisiál mídia PR”, dehan ekipa mídia.
Tanba ne'e Ekipa Midia PR husu deskulpa ba mídia sira atu koopera malu nafatin. “Ami mós ho haraik husu deskulpa ba belun sira hotu. Hanesan ita hotu akompaña no rona rasik mensajen Na’i PR nia deklarasaun bainhira vizita ba SAMES”.
Maibé ho esperansa no fiar-an ekipa mídia PR deklara ba oin sei labele mosu bebeik erru hirak ne'e, astubele kontinua nafatin servisu hamutuk.
Antes ne’e Prezidente Repúblika (PR), José Ramos Horta, akuza funsionáriu sira iha Prezidénsia bainhira akompaña atividade vizita husi Xefe Estadu ba Munisípiu sira hodi buka per diem.
“Tanba ne'e, kuandu ha'u ba foho ne'e ha’u gosta ba foho mais agora ha'u ko'a tanba ha'u kuandu ba foho ne'e lubuk ida iha Prezidénsia ne'e hakarak tuir, la halo buat ida mais tuir hanesan manu-lin. Tanba sá, la'ós tanba sira hadomi ha'u, tanba sira hakarak per diem”, dehan Horta hafoin hala'o vizita kortejia ba Armajen SAMES iha Kampu Alor, segunda (01/08).
Ba preokupasaun ne'e, Prezidente Repúblika sei halo diálogu ho Governu no Parlamentu Nasionál tau osan loloos, no di'ak liu ko'a tiha osan per diem, tanba Timor ne'e agora buka per diem.
“Per diem ne'e hanesan hare ne'ebé o fakar ba manu-lin, entaun di'ak liu per diem ne'e tau fó ba setór saúde, fó ba mestre (profesór sira) iha foho ne'ebá, duke fó fali ba baruk ten sira”, afirma nia.
Tanba ne'e, Xefe Estadu mós sei hanoin didi'ak bainhira atu ba vizita ruma iha foho, no ba karik di'ak liu sai suba-subar nune'e ekipa Prezidénsia no seguransa lalika hatene, duke lori ema limanolu (50) no atusida (100) entaun di'ak liu osan sira nee rai hamutuk fó ba inan sira iha merkadu Manleuana ho Taibessi. (*)