“Programa Uma Kbi’it Laek, ba tinan ida ne’e ninian (2022) benefisiáriu sira hamutuk 4.000 ne’e identifikadu hotu ona, no Sekretariadu Téknika Programa Nasionál Dezenvolvimentu Suku (PNDS) hato'o ona proposta mai ha’u atu transfere osan ba suku sira atu konstrusaun hahú”, dehan nia ba jornalista sira iha Palásiu Governu, kuarta (03/08).

Uma Kbi’it Laek (UKL) tinan 2022, Governu despeza hamutuk millaun $71 iha suku hamutuk 424 no kada suku balun hetan uma 10 no balun uma 9 no balun 12.

Medida ba UKL kuaze hanesan maibé ba família ki’ikoan sei hetan kuartu rua no ba família boot sei sei okupasaun kuartu tolu.

Bainhira simu proposta halo kedas transferénsia orsamentu ba Konstrusaun UKL ba suku hodi hahú konstrusaun iha tinan 2022, no tuir planu sei konklui iha tinan ne’e ho tarjetu sei remata durante fulan tolu ka haat nia laran.

“Entaun agora dadauk ne’e akontese iha Munisípiu sira prosesu sira atu halo konstrusaun ne'e konklui hotu ona e agora sira hahú halo ona konstrusaun no planu kalendáriu ne’e Konstrusaun Uma Kbi’it Laek ne’e sentru de fulan tolu no haat ne’e uma sira ne’e sei konklui hotu”, dehan nia.

Maibé Konstrusaun UKL ne'e balun konstroi iha área urbana, nomós área rurál, baibain iha área urbana ne’e finaliza lalais maibé iha área rurál kleur tanba kestaun estrada tama difikulta materiál sira konstrusaun tama tarde.

Maibé Governu optimista katak konstrusaun UKL tinan 2022 ho kuantidade 4.000 sei finaliza iha tinan ne'e. (*)