“Ha'u sente Eskola tékniku Vokasionál iha Timor laran tomak kuaze hanesan. Ha'u hetan informasaun direta husi diretór Eskola tékniku Vokasionál Mau-Hunu Bukar Manatutu. Diretór ne'e haruka fali nia mestri sira ba aruma fali kadeira at iha eskola sira iha fatin seluk, mai prega e balun solda, tau iha aula para labarik sira tur lori simu matéria ou ensinu aprendizajen husi mestri sira”, hatete nia iha plenáriu PN, tersa (02/08).

Ba situasaun ne'e, Bankada CNRT hakarak husu iha plenária ida-ne'e atubele kanaliza ba Ministériu Edukasaun Juventude no Desportu (MEJD) presiza tau fasilidade materiál Eskolar ba Eskola tékniku Vokasionál.

Tanba preokupasaun ne'ebé ETV hasoru ne'e la'ós de'it situasaun kadeira, maibé mós  pulsa eletrisidade ne'ebé durante ne'e Diretór ETV ho nia profesór sira mak tau osan hamutuk hodi ense para fasilita funsionamentu iha eskola.

“Ne'e e uza nia osan rasik ense pulsa. Dada ahi (eletrisidade) ba Eskola refere, ita hatene katak ida-ne'e edifísiu Estadu, gratuita, maibé diretór no profesór sira tau hamutuk fali osan sosa pulsa para dada ahi e ita-nia oan sira uza”, hatete nia.

Ho situasaun hira ne'e Bankada CNRT hakarak husu oinsá ho responsabilidade husi Ministériu Edukasaun Juventude no Desportu atubele haree asuntu sira-ne'e tanba Ensinu Tékniku Vokasionál ne'e nu'udar instituisaun estadu nian.

“Sim Ministériu Edukasaun, ne'e boot e luan maibé pelumenus iha kraik, iha nia Diretór no inspetór sira tenke ba identifika para tau matan ba asuntu si real hanesan ne'e”, hatete nia.

Iha mós situasaun estrutura eskola iha Ensinu Sekundáriu Báziku no Ensinu Sekundária Jerál (ESJ) ne'ebé mak nomeia husi Diretór Edukasaun, maibé ikus mai hetan kanselamentu tanba laiha despaisu husi MEJD.

Maske iha fulan hirak liubá Diretór Jerál Ministériu Edukasaun hasai ona karta kanselamentu ba despaisu ne'ebé diretór Edukasaun hasai, maibé realidade iha Eskola balun, estrutura ne'ebé diretór edukasan nomeia to'o agora nafatin funsiona hela.

“Ha'u lalika ba dook, fila ba Ermera de'it, Nino Koni Santana, Diretór ida-ne'e haruka para tiha ona maibé diretór ne'e mak ezekuta osan, diretór ida tuan legál ne'e ba asina de'it slip foti osan, mai nia (Diretór foun) mak ezekuta”, katak nia.

Nune'e mós iha Eskola balun fali estrutura nomeia husi Diretór Edukasaun maske kansela maib’e nia kontinua ezekuta fali orsamentu ne'ebé MEJD fó ba, hanesan merenda Eskolar nomós Konsellu Eskolar.

“Husu ba Sekretáriu Estadu favór ida haree ba asuntu ida-ne'e rezolve halo didi'ak para labele dupla desizaun iha Eskola ida, ne'e instituisaun”, haktuir nia. (*)