DILI – Kalendariu kampaña eleitoral ba eleisaun antisipada remata ona iha loron Kuarta, 9 Maio liubá, maibé deskonfia movimentu militante partidu FRETILIN iha munsipiu sira oras ne’e la’o maka’as tebes ho rajaun la klaru. 

Bazeia ba informasaun balun ne’ebé Tempo Timor asesu iha munisipiu balun katak, deskonfia militante partidu FRETILIN nian komesa fahe ona foos no Super Mie iha tempu silensiu ho intensaun atu sosa votus. Situasaun ne’e akontese iha postu Atabae, Maliana villa no iha Oe – Kusi Ambeno iha Kinta kalan, 10 Maio 2018. 

“Ami nia ema sira foin ka’er sira ho kareta hatun hela foos no super mie iha tempu kalan boot,” informa fonte ida ba Tempo Timor, Kinta (10/05). 

Nia hatutan, movimentu militante FRETILIN nian iha Oe – Kusi espalla ba suku lima hanesan, suku Costa (Samoro), suku Beneufe (Bitila), suku Suni Ufe (Oenunu), Bana Afi no Lel Uf. 

“Kada suku, sira mai lori foos saku 25 no super mie kaixa ka dos 25 hodi fahe ba komunidade sira. Ami konsidera ida ne’e dalan ida atu sosa votus, tanba sira fahe iha tempu kalan,” esplika fonte ne’e.  

Nia hatutan, militante FRETILIN ne’ebé akompaña kareta ba hatun foos iha Oenunu (Suku Suni Ufe) mak hanesan Thomas Name, Jacinto Anin Falo no António Sonbai. Entretantu, militante ka kamarada FRETILIN ne’ebé ho kareta Mane Rua Abi ba hatun foos no Super Mie iha Bitila (Suku Beneufe) mak hanesan Rafael Kloe no Francisco Sali Kolo. 

Kada suku hetan foos saku 25 no super mie dos 25. Entaun, kada suku ida hetan foos hamutuk saku 125 no super mie saku 125. Total entre foos saku 125 ho super mie dos 125 mak 250.

“Agora parte seguransa ka’er ona sira, no ita sei hein prosesu tuir mai,” nia hatete. 

Entretantu, situasaun ne’e mós akontese iha Maliana villa deskonfia militante FRETILIN nian mós la’o tama – sai uma lori foos no super mie iha tempu kalan hodi fahe ba uma kain sira ne’ebé identifika ona. Hafoin fahe sasan sira ne’e, militante FRETILIN mós lori hela surat ida hakerek lia fuan Subsidiu Negósiu Ki’ik no haruka uma kain sira ne’ebé simu fós no Super Mie ne’e tenke hakerek sira nia naran kompletu no asina, no lia fuan ikus iha surat ne’e katak tenke apoiu programa governu atual.

Maibé, bainhira Tempo Timor konfirma assuntu ne’e ba Prezidente Autoridade munisipiu Bobonaro Zeferino Soares dos Santos hatete katak, nia ladun iha informasaun klean kona – bá atividade fahe foos no super mie iha tempu kalan, maibé nia hatene de’it mak militante FRETILIN nian ameasa joven sira iha Maliana villa.

“Iha labarik nain lubuk ida mak sira sente ameasadu, entaun sira telefone ha’u ba foti sira. Depois ha’u tula sira sa’e mai, ha’u hare ema nain rua ho motor ida tuir. Entaun, ha’u fila kareta halai tuir ema sira ne’e, no sira halai tama ba lider partidu ida nia uma. Sira grupu boot ida mak tur hela iha uma ne’e. Sira ne’e mak ameasa hela ita nia labarik sira iha vila laran,” hatete Zeferino via telemovel ba Tempo Timor, Kinta (10/05).

Entretantu, Tempo Timor halo kedas konfirmasaun ba sekretariu jeral partidu FRETILIN atual primeiru – ministru Mari Alkatiri no prezidente substitutu Rejiaun Administrativu Espesial Oe – Kusi Ambeno (RAEOA) no Zona Ekonómia Espesial Sosial no Merkadu (ZEESM), Arsenio Paixão Bano, maibé la iha resposta. (Oki)