“Servisu mídia nia ne'e durante ne'e la'o di'ak tebes, buat hothotu la'o tuir koridór ne'ebé mak iha, e dalaruma buat balun falla maibé ne'e normál mais ita presiza hadi’a nafatin, nível mídia ninia, nune'e ba oin bele la'o di'ak liután”, dehan Ministru Francisco Martins, iha Farol, segunda (01/08).

Maske servisu mídia la'o di'ak tebes maibé labele haluha katak mundu ohin loron tama ona iha dijital, nune'e mídia sira prepara-an didi’ak bele kompete no adapta ho situasaun dijitalizasaun ne'ebé mak oras ne'e la'o.

“Mídia ohin loron la'o maka’as, la'o dook, e ita kompara ho tinan sira hirak ba kotuk ne'e ita iha ne'e dook liu ona, entaun ita mós prepara-an didi’ak bele kompete no adapta ho situasaun dijitalizasaun ne'ebé mak oras ne'e la'o”, afirma nia.

Nune'e nafatin iha responsabilidade ba liberdade espresaun no liberdade asesu informasaun, maske laiha ema ida mak bandu liberdade espresaun no liberdade hetan informasaun ne’ebé konsgra ona tuir lei komunikasaun no konstituisaun Repúblika.

“Los, iha buat liberdade espresaun, sim buat hotu ita espresa ho vontade laiha ida mak bandu maibé ha'u sempre hatete katak iha ne’eba ne'e sempre iha liafuan ida responsabilidade, nune'e nafatin responsavel ba saida mak ita espresa”, hatete nia. (*)