Tuir informasaun ne’ebé www.tempotimor.com, asesu iha pájina MOP, domingu (31/07) katak, Ministru Obras Públikas (MOP), Abel Pires da Silva, akompaña Sekretáriu Estadu Asuntu Kombatentes Libertasaun Nasionál (SEAKLN), Júlio da Conseição 'Loro Mesak', halo enseramentu ba verifikasaun dadus veteranu 2009 nian iha munisípiu Kovalima, iha aldeia Asurai, suku Debos, postu administrativu Suai, munisípiu Kovalima.

Sekretáriu Estadu husu apoiu ekipamentu pezadu Institutu Jestaun Ekipamentus Institutu Públiku (IJE.IP) nian hodi hatetuk rai iha aldeia Aidantuik, Suku Beko, Postu Administrativu Suai, Munisípiu Covalima ne’ebé sei sai fatin ba konstrusaun Jardin Erois iha Covalima.

Hafoin enseramentu, Ministru Obras Públika, Abel Pires hatete, pedidu apoiu ekipamentu Ministériu Obras Públikas simu ona no despaxu ona ba IJE.IP maibé IJE.IP sei preokupa ho atendimentu inundasaun foin lalais ne’e mak seidauk bele atende.

Bainhira antende hotu inundadasaun sei apoiu hatetuk fatin ba konstrusaun Jardin Erois iha Covalima.

“La’ós foin pedidu verbal ohin maibé pedidu eskrita ne’e ba tiha ona iha fulan kotuk kedas e despaxu ba tiha ona IJE atu tau-matan maibé tanba semana rua no tolu liuba ne’e udan boot iha fatin barak entaun agora daudauk ne’e IJE haree lai ba rekoperasaun husi ida-ne’e, depois ne’e liu ona ita tau-matan fali bai da-ne’e”, dehan Ministru Abel Pires.

Tanba Prezidente IJE.IP sei halo vizita ba Suai MOP sei hato’o direta kona-ba ida-ne’e, hodi haree atubele rezolve kedas tanba ne’e pedidu importaante.

“Ne’e kona-ba ita-nia eroi sira ne’ebé sakrifika sira-nia-an ona iha tempu pasadu e merese hetan tratamentu di’ak husi ita, ne’ebé sira-nia sakrifísiu ne’e labele lakon de’it, ita tenke fó respeitu nafatin ba sira, kontinua fahe istória ne’e ba ita-nia oan no beioan sira aban bainrua, para ita bele hatene katak ukun-an ne’e la’ós simu husi bandeja”, afirma nia.

Bazeia ba pedidu ne’e, iha loron 30 fulan-Jullu 2022, Ministru Obras Públikas hamutuk ho Sekretáriu Estadu SEAKLN, Júlio da Conseição 'Loro Mesak', no Prezidente IJE.IP, Hermenegilda da Costa Laurentina, haree kedas tereñu ba konstrusaun Jardin Erois iha Covalima. (*)