Tuir informasaun ne’ebé www.tempotimor.com, asesu iha pájina MOP, kinta (28/07) katak, ponte temporáriu sei fasilita movimentu transporte no ema nian iha área ferere.

“Ponte ne’e (Ponte Bekussi) ida okos ne’e ita hasai tiha para depois see dezeñu ida foun ne’e kompletu, tender ne’e ita sobu daudauk maibé tenke fasilita movimentu nafatin tanba ne’e mak ita monta ponte temporáriu ne’e, ponte temporáriu ne’e serve buat rua, objetivu rua, ida redús rísku inundasaun husi ponte ida agora ezistente ne’e, segundu kontinua fasilita populasaun sira-nia movimentu”, esplika Ministru Obras Públikas Abel.

Kona-ba ponte Mota Masin iha Fronteira, munisípiu Kovalima, Ponte Mota Masin ne’e sobu ona. Tanba Ponte iha Mota Masin iha rua mak ida halo ho besi, ida fali Indonézia mak halo, daudauk ne’e uza mak Indonézia halo ne’e, ne’ebé ida Governu halo la uza, tanba ne’e mak aproveita sobu para monta fali iha Bekussi ne’e.

Ponte ne’ebé Monta provizóriu para depois ida okos ezistente ne’e hasai tiha risku ida bee atu akontese kauza husi inundasaun dalarua ne’e hamenus, so bele ba hamensu la’ós 100% atu halakon risku lae, tanba bele akontese tan buat seluk ke bele halo inundasaun mais risku ida mai husi ponte nia dezeñu halo hanesan kuartu-kuartu ne’e, ne’e mak atu halo lakon, hasai tanba semana kotuk sei udan, tinan ne’e udan naruk oituan.

“Tanba ne’e ha’u hanesan responsável ministériu ha’u lakohi kontinua fó risku ba ita-nia komunidade”, dehan nia.

Ministru Abel hatutan orsamentu ki’ik 100 mill mós la to’o, ADN verifika ne’ebé buat hotu transparante, buat hotu tuir prosedura maibé hakarak halo lais.

“Ha’u mai husi Parlamentu e komunidade lubuk ida mak momentu akontese inundasaun ne’e ba hato’o keixa mai ami, tanis, família rungu-ranga, kalan tenke lori oan sira ba fatin ne’ebé seguru e depois tahu mós mahar loos iha ne’eba, ema hamoos to’o fulan mós la hotu, ida-ne’e mosu tanba dezeñu ponte ne’e e ita hakarak halo lakon ida-ne’e”, hatete nia.

Kompaña konstrutór daudauk ne’e sobu ona ponte besi iha Mota Masin no prepara ona ri’in ba ponte temporáriu iha ponte Bekussi, tanba ne’e iha tempu badak sei monta ponte temporáriu iha Bekussi no sobu ponte Bekussi tuan ne’ebé sai kauza ba inundasaun iha área refere. (*)