Ba Kompromisu ne'e, Ministru Justisa (MJ), Tiago Amaral Sarmento hamutuk ho Vise Ministru Finansa (MF), Antoni Freitas, ne’ebé akompaña husi Ministru ba Asuntu Parlamentár no Komunikasaun Sosiál (MAPKomS), Francisco Martins da Costa Pereira Jerónimo iha loron tersa (26/07) halo audénsia ho Prezidente Parlamentu Nasionál, Aniceto Longuinhos Guterres Lopes, hodi halo Koordenasaun kona-ba rai ne'ebé sei utiliza ba hari’i edifísiu foun.

“Durante iha reuniaun ne'e ko’alia kona-ba rai ne'ebé atu hari’i edifísiu foun ba PN. Nune’e ministériu sira ne’e bele halo levantamentu no identifikasaun iha tempu badak antes entrega ba Parlamentu Nasionál hodi halo preparasaun no planu tékniku sira”, informasaun ne'ebé www.tempotimor.com asesu husi Gabinete Prezidente Parlamentu Nasionál, Aniceto Longuinhos Guterres Lopes, kinta (20/07).

Dadaun ne'e, parte Governu mós deside indika ona rai-estadu nian ida ne'ebé lokaliza iha Suku Hera, Postu Administrativu Metinaru, Munisípiu Dili atubele hari’i edifísiu foun tuir nesesidade Parlamentu Nasionál.

Reuniaun ne'e diskute kona-ba prosesu levantamentu tékniku husi Diresaun Jerál Terras no Propriedade ba Terrenu ne'ebé tuir planu sei atribui ba Parlamentu Nasionál hodi hari’i edifísiu foun Parlamentu Nasionál nian ho luan totál ektare 15, enkuantu ektare 10 remata ona, no sei kontinua halo levantamentu ba ektare 5 tan hodi kompleta ektare 15 bazeia ba pedidu husi PN.

Antes ne'e, Parlamentu Nasionál rasik aprova ona projetu rezolusaun númeru 100/V(4a) kona-ba lokalizasaun edifísiu foun PN ne'ebé tuir planu sei muda ba iha Suku Hera. (*)