Tempotimor (Dili)-Deputadu sira iha Parlamentu Nasionál konsidera Ministériu Obras Públika (MOP) ne’ebé lidera husi Salvadór Pires laiha kapasidade ezekuta Orsamentu Jeral Estadu (OJE) 2019. Tanba iha fulan 10 nia laran MOP foin ezekuta de’it pursentu 59.
Deputadu husi Bankada FRETILIN, Silvino Morais hatete, iha fulan 10 nia laran MOP foin ezekuta de’it pursentu 59 husi OJE 2019.
Ho nune’e, deputadu ne’e duvida ho deklarasaun husi MOP ne’ebé hatete katak sei ezekuta OJE pursentu 100 iha tinan 2019 nia rohan.
"Señor ministru iha mehi katak to'o iha Dezembru 2019 ne'e MOP sei ezekuta OJE 2019 pursentu 100, maibé ha'u dúvida uitoan, tanba durante fulan 10, foin 59%, depois hela de'it fulan rua mak atu atinje 100%? ne'e ha'u duvida boot," dehan deputadu Silvino bainhira halo audensia ho Ministru Salvadór iha PN, Segunda (28/10/2019).
Iha fatin hanesan, deputada Komisaun C trata asuntu Ekonomia no Finansas, Maria Angelica Rangel konsidera Ministru Salvadór laiha kapasidade atu ezekuta OJE.
"Ezekusaun orsamentu ne'ebé iha ita-boot ninia ministériu, ha'u bele dehan, ita-boot, ho ita-boot nia ministériu laiha kapasidade atu halo ezekusaun, tanba to'o iha fulan Outubru ministru ida ne’e foin ezekuta OJE 2019 iha pursentu 60 resin," dehan Deputada Angelica.
Nia hatutan, MOP mós la konsege implementa politika orsamental 2018.
"Orsamentu ne'ebé uluk tau ba kontrolu ba estrada no ponte sira ne'e tau $10.9 millaun dolar Amerikanu, maibé nia ezekusaun 1.5%. Diretór sira iha ita-boot nia kotuk ne'e balun mak foun, balun mesak tuan, husi ukun aan mak mai, tanba saida mak ezekusaun ne’e kiik ida hanesan ne'e?," nia kestiona.
