“Graças a Deus, Prezidente Repúblika konfirmadu katak sei partisipa mós iha jornada Nasionál juventude Katólika iha parókia Lolotoe”, dehan Padre João hafoin termina audénsia ho PR Horta iha palásiu Prezidensial, Bairo Pite, kuarta (27/07).
Atividade jornada Nasionál Katólika ne'e hala'o durante loron lima nia-laran, hahú husi loron 21 to'o 25 fulan-agostu tinan 2022.
Tanba ne'e, ho Xefe Estadu ninia disponibilidade no dispozisaun tomak espera katak atividade sira ne'e hotu bele la'o ho di'ak.
Programa hirak ne'ebé sei hala'o iha atividade jornada ne'e, dahuluk mak oinsá juventude sira-nia hamutuk, hodi bele partilla mós esperiénsia sira.
Ba atividade jornada ne'e mós sei iha formasaun no palestra, inklui sei fó oportunidade atu rona joven sira-nia liafuan no opiniaun ne'ebé sei hato'o inklui mós sira-nia krítika sira.
Nune'e mós sei lori joven sira ba hala'o asaun karidade tuir possibilidade ne'ebé komunidade sira presiza. (*)