Komunidade Suku Manleuana, Julião de Araújo hatete, sira-nia parte mai hatama dokumentu (proposta) iha palásiu prezidensial tanba rona informasaun no despaisu katak Prezidénsia Repúblika sei fó apoiu ba sidadaun sira ne'ebé mak laiha kbi'it.

Tanba ne'e sente la satisfas wainhira mai hatama proposta, balun simu ona maibé balun la simu no tau de'it iha Portaun oin.

“Ami balun hatama ona e husi Família balun mós hatama ona, mais balun agora foin mai atu hatama mais agora balun asesu ona balun seidauk ne'ebé tau de'it hanesan ne'e”, hatete nia ba www.tempotimor.com, iha resintu Palásiu Prezidensiál, tersa (26/07).

Dadaun dokumentu hirak ne'e mós la'os naran mai hatama de'it, bainhira laiha despaisu ruma ba povu atu halo proposta ruma ba palásiu prezidensial nomós Governu atu fó netik subsídiu ruma ba povu ne'e, maibé da-ne'e fó sai ona iha mídia entaun mai iha ne'e atu kumpre buat ne'ebé mak fó sai.

“Mais kuandu dehan soe ami-nia dokumentu ne'e la'ós soe dokumentu, ne'e soe ami povu”, hatete nia

Hatan ba kestaun ne'e Asesór polítika Prezidénsia Repúblika (PR), Tomas Cabral hatete, nia parte ko'alia ona ho Prezidente Repúblika kona-ba kestaun pedidu sira ne'ebé hato'o hosi populasaun, bainhira ema ruma mak halo aktu ida-ne'e sala tanba Prezidénsia Repúblika nia papel mak atu kontrola funsionamentu estadu no la'ós Administrativu.

“Ha'u mós foin ko'alia ho Prezidente Repúblika, e prezidente husu atu fó sai iha ne'e, sé ema-ruma hanoin halo aktu ida-ne'e sala. Palásiu Prezidente Repúblika nia papel atu kontrola funsionamentu estadu, tanba ne'e mak ami mai iha ne'e em nome do palásiu ho Organizasaun palásiu nian atu hato'o konferénsia Imprensa ba ita-boot sira atu publika ba públiku kona-ba situasaun kondisaun palásiu ne'e palásiu ba Povu nian duni maibé aktu administrativu ne'e aktu la'o oin seluk la'ós hanesan ita hatene”, hatete nia.

Maibé ko'alia kona-ba Kampana polítika ne'e buat seluk ida, tanba kampaña ne'e atu ko'alia ba militante, maibé pedidu rihun-neen ne'ebé mak haruka mai ne'e la identifika dehan katak sira halo kampaña.

Tanba ne'e, hanoin katak kestaun sira kampaña ne'e propaganda polítika nomós kestaun sira Governativa ne'e aktu administrativu, felismente rua ne'e labele hanesan.

“Labele kaer propaganda eleitorál ho aktu administrativu tanba Prezidente mak orgaun soberanu estadu dahuluk kontrola funsionamentu estadu. Kuandu Prezidente mai iha ne'e Prezidente ba ema hotu, ne'ebé ida ohin kampaña ne'e iha terenu e ekipa ida apoia ba kandidatura sede ne'e, lei iha, komisaun Nasionál ba eleisaun sira (CNE) haruka ita taka tiha ona, ne'ebé matéria kampaña ita fila ba kotuk”, esplika nia.

Ba preokupasaun pedidu rihun-neen ne'ebé haruka ona mai iha Gabinete PR ne'e, felizmente parte palásiu Prezidensiál sei haree possibilidade atu re-enkamiña ba Ministériu kompetente hodi fó solusaun ho urjentemente.

Maibé parte ekipa tékniku sira husi PR mós sei esforsu atu buka tuir autór prinsipál sira ne'ebé mak fasilita sidadaun sira hodi hato'o pedidu ida-ne'e ba PR. (*)