Print this page

DTP Baukau Husu MJ Responde Pedidu Hadi’a Karreta

Karreta Estadu ne'ebe kondisaun ladi'ak para hela iha Edifisiu DTP Munisipiu Baukau. Karreta Estadu ne'ebe kondisaun ladi'ak para hela iha Edifisiu DTP Munisipiu Baukau. Foto Tempo Timor

Tempotimor (Baukau)-Servisu Diresaun Terras Propriedade (DTP) Munisípiu Baukau husu Ministéru Justisa (MJ) atu responde pedidu manutensaun ba karreta Estadu ne’ebé at kuaze fulan-4 ona.

“Komesa iha fulan-Marsu tinan-2022 ne'e karreta la la'o ona, entaun preukupasaun ne'e ami hato'o ba Ministériu Justisa liliu Diresaun Jerál Terras Propriedade, até data seidauk iha responde atu halo manutensaun ba karreta ne'e”, dehan Diretór DTP Baukau, Raimundo de Jesus Barros, iha kna'ar fatin Tirilolo Baukau, tersa (26/07).

Tanba ne’e, husu ba MJ atu responde ona pedidu manutensaun ba karreta nian ne'ebé avaria, nune'e bele halo servisu hodi finaliza levantamentu no regulariza ba uma no rai estadu iha Munisípiu Baukau iha tinan-2022.

“Sé transporte di'ak ona ami servisu di'ak liután, sei kobre hotu kedas iha Baukau, identifika hotu kedas rai estadu sira ne'ebé mak komunidade okupa, regulariza fó reseita ba kofre estadu”, afirma nai.

Durante ne'e ékipa tekníku DTP Baukau utiliza transporte privadu hodi regulariza no halo levantamentu ba uma no rai estadu, maibé kontinua fó difikulta, tanba labele kobre to'o nível Postu Administrativu hotu, hanesan Postu Baguia, Laga, Kelikai, Veninale inklui Vemase ne'ebé rejistu ona, maibé seidauk halo kontratu atu selu arendamentu nian ba estadu.

Nune'e, ékipa tekníku sira foin halo levantamentu no regulariza uma no rai estadu iha Postu Administrativu Baukau Vila hamutuk 161 parselas mak kada fulan selu taxa ba estadu.

Husi uma no rai estadu hamutuk 161 parselas DTP Baukau rekolla taxa inisiu fulan-janeiru to'o fulan-jullu tinan-2022 hamutuk montante US$12.921,00 hodi ajuda kofre ba kofre estadu.

“Totál husi 161 parselas ne'ebé iha kontratu arendamentu ne'e, kompostu husi rezidénsia, no mós komérsiu, rezidénsia ita hahú husi US$10 ba leten to'o US$20 depende avaliasaun, kona-ba komérsiu nian husi US$20 ba leten, depende mós nia avaliasaun foin termina nia valór”, esplika nia.

Iha Munisípiu Baukau Postu Administrativu 6, hanesan Postu Baguia iha Suku 10 Aldeia 47 ho área luan 209,59km², Postu Administrativu Baukau vila iha Suku 11 Aldeia 67 ho área luan 367,5km², Postu Laga iha Suku 8 Aldeia 57 ho área luan 199,73km², Postu Kelikai iha Suku 15 Aldeia 55 ho área luan 205,65km², Postu Vemase iha Suku 7 Aldeia 22 ho área luan 373,03km², inklui Postu Administrativu Venilale Suku 8 Aldeia 35 ho área luan 150,28km².

Iha Munisípiu Baukau, iha Xefe familía hamutuk 35,388, mane 80,033, no feto 79,080 ho totál hamutuk 159,083. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items