“Sim, ami atualiza kestaun rekrutamentu iha funsaun públika nia laran, nune’e mós kestaun realokasaun pesoál sira bainhira hasoru polítika reestruturasaun husi ministériu ida aloka fali ba KFP, hafoin ami halo realokasaun ba instituisaun sira seluk. Nune’e mós ba kargu direjente iha funsaun públika nian”, dehan Faustino Cardoso, iha rezidénsia Ofisiál PM, Farol, tersa (26/07).
Tanba ne’e, bele asegura armonia no ekilíbru di’ak, dezempeñu ne’ebé efikásia, no efisiente iha administrasaun públika.
Daudaun ne’e númeru funsionáriu públiku aumenta ba beibeik, sura hamutuk ho Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL) no funsionáriu kazuál hamutuk kuaze 54.000.
“Ami atualiza ba Primeiru Ministru kona-ba aumentu forsa traballu iha funsaun públika, dala barak ami sempre hato’o katak, oras ne’e númeru funsionáriu aumenta ba bebeik ba 35.900, inklui PNTL, F-FDTL no kazuál besik ona 54.000, ne’ebé iha tendénsia aumenta bebeik tanba ne’e komisaun akonsella Primeiru Ministru atu haree didi’ak situasaun ida-ne’e”, hatete nia.
Nune'e, Primeiru-Ministru (PM), Taur Matan Ruak, mós ezize Komisaun Funsaun Públika (KFP) atu labele interfere servisu téniku tanba de’it diferensa polítika.
“Primeiru-Ministru ezije komisaun tau atensaun maka’as ba separasaun polítika ho tékniku sira, labele interfere servisu tékniku liuhusi kestaun polítika, tenke fó valorizasaun a’as ba servisu tékniku, no esperiénsia téknika iha funsaun públika”, hatutan nia.
Aleinde ne’e, Xefe Governu orienta KFP atu haree didi’ak polítika Governu hanesan polítika reforma administrasaun iha funsaun públika, ne’ebé efisiente liuhusi apoia funsionamentu rekursu umanu, dezenvolve ekonomia, apoia setór privadu, no apoia rekursu naturál ne’ebé iha ho maneira amigável ba meiu ambiente. (*)