Tuir informasaun ne’ebé www.tempotimor.com, asesu iha pájina Relasaun Públika F-FDTL, tersa (26/07) katak, tuir ajenda Xefe Estadu Maior Jenerál F-FDTL ho delegasaun desloka ba Austrália iha sidade Sydney tanba heta konvite atu partisipa iha konferénsia entre Xefe Estadu Maior Jenerál INDO-PASIFICO ne’ebé maka realija iha Sydney, Austrália.

Ho nune’e rona Delegasaun Xefe Estadu Maior Jenerál nian ba sidade Sydney Timoroan hirak ne’e ho inisiativa kedas hasoru ho Xefe Estadu Maior Jenerál hodi komprimenta.

Wainhira dada lia ho Tenente Jenerál Falur Late Laek, Timoroan hatete, sira rona katak Jenerál Falur Rate Laek mai iha Austrália, entaun sira hamutuk ho kolega sira bolu malu kedas hodi komprimenta ho Jenerál Falur, tanba kuaze tinan barak sira servisu iha Austrália.

Tanba pandemia COVID-19 sira mós la fila mai Timor-Leste, entaun sira rona katak lider F-FDTL nian ba sidade Sydney, sira bolu malu kedas no kontente tebes ho servisu ne’ebé okupadu maibé Jenerál disponibél tempu hodi hasoru, no fó lia menon no motivasaun.

Iha biban ida-ne’e Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek, husu atu sira servisu ho di’ak kaer malu nafatin nu’udar Timoroan labele mete ba arte marsiál no haree ba kór hodi baku malu, maibé hamutuk nu’udar Timoroan buka servisu aban bain rua fila ba Timor-Leste hodi hadi’a ekonómia família uma laran nian.

“Husu ba imi mai iha ne’e buka servisu no tau iha imi-nia hanoin katak família iha Timor-Leste tau konfiansa ba ita-boot sira, aban bainrua fila halo mudansa ba ekonómia uma laran ninian, imi tenke koopera malu esperitu kooperativu no solidariedade ba malu, oras servisu imi tenke disiplina labele tarde, nomós labele mete arte marsiál no kór hodi insulta baku malu ne’e labele, imi tenke hanoin hau mai iha ne’e hodi buka servisu atu nune’e fila lori netik buat di’ak ba Família iha Timor, mesmu imi husi Munisípiu ketak ketak, maibé imi mesak Timoroan hotu”, dehan Tenente Jenerál Falur. (*)