BAUKAU – Kazu krime sira ne’ebé durante ne’e akontese iha rai laran hanesan iha suku Makadiki, Venilale no fatin seluk tan maioria nu’udar militante partidu Alliansa Mudansa ba Progresu (AMP ) mak sai vitima, tanba ne’e prezidente AMP husu ba povu tomak atu labele vota ba partidu ne’ebé halo anarkizmu, maibé tenke vota ba partidu ne’ebé promove valor demokrásia no tane a’as valor direitu humanu iha rai laran. 

“Sai militante radikal ne’e tenke hanesan ema para hadomi ema, la’os hanesan asufuik hodi tata ema arbiru de’it. Partidu hanesan ne’e la merese atu ukun Timor,” hatete Xanana liu hosi nia kampaña politika iha kampu aviasaun Baukau, Domingo (06/05).

Xanana mós akuza partidu FRETILIN ne’ebé foin funda tiha tinan 2000 no lidera hosi Mari Alkatiri oras ne’e la respeita ona valor demokrásia hodi viola no obriga ema nia direitu ba hili partidu politika ne’ebé de’it mak ema hakarak.

“Iha Oe – Kusi sira fahe foos, ameasa ema hodi vota ba sira. Partidu ne’e la merese atu ukun Timor”.

“Militante AMP mesak ema matenek de’it. Labele hatan provokasaun ho asaun v‑iolensia. Tenke mantein paz no estabilidade”.

La’ós iha Oe – Kusi Ambeno de’it, maibé kazu grave liu mak iha suku Makadiki, Vikeke ne’ebé deskonfia militante FRETILIN halo ataka ba militante AMP nian iha loron Sesta (05/05) hodi rezulta ema nain 18 kanek no estraga mós kareta vaskolante rua.

Koordenador partidu CNRT postu Uatulari, Jorge Ribeiro hatete, militante Alliansa Mudansa ba Progresu (AMP) ne’ebé hetan atake hosi militante partidu FRETILIN iha suku Makadiki hamutuk ema nain 18 no baku rahun kareta vaskolante rua, maibé infelizmente to’o oras ne’e polisia rasik seidauk ka’er suspeitu sira.

“Horseik ne’e polisia no forsa mós kompletu iha fatin akontesementu, maibé infelizmente to’o oras ne’e seidauk ka’er ema ida,” hatete Jorge via kontaktu telemovel ba Tempo Timor, Domingo (06/05).

Insidente ne’e akontese besik hela atividade mini kampaña partidu FRETILIN nian iha suku Makadiki ne’ebé hala’o iha Sabádu, 5 Maio 2018.

Bazeia ba informasaun ne’ebé Tempo Timor asesu katak, iha akontesimentu ne'e vitima sira husu ajuda ba PNTL Uatulari iha fatin akontesementu, infelizmente polisia husik de’it hodi argumenta katak polisia labele atua, tanba massa barak liu. Hafoin ida ne’e mak membru F – FDTL sira mós to’o iha fatin akontesementu hodi tiru sa’e ba leten atu hakalma konflitu ne’ebé akontese entre parte rua. Hosi akontesementu ne’e, membru F – FDTL konsege ka’er tiha ema nain tolu no oras ne’e detein hela iha polisia eskuadra Uatulari nian.

Situasuan ne’e la’ós akontese de’it ba militante AMP nian iha suku Makadiki, maibé akontese mós militante AMP sira seluk bainhira sai hosi Vikeke vila atu ba hala’o tan mini kampaña iha postu Ossu hetan tan ataka (tuda dala rua) hosi grupu deskoñesidu sira inklui tau prigu ba estrada klaran hodi estrada kareta AMP sira nian.‑

Bainhira to’o postu Ossu, prezidente AMP, Kay Rala Xanana Gusmão atu labele hatan provokasaun hosi partidu seluk ho violensia, maibé tenke tun ba ko’alia didi’ak ho sira hodi nune’e bele evita konflitu.

Entretantu, komnandandate polisia munisipiu Vikeke, António Mauluta rekoñese katak kazu ataka malu ne’e akontese duni, maibé seidauk identifika suspeitu sira ne’e mai hosi partidu ne’ebé.

“Kanek loloos ne’e hamutik nain 14 no harahun kareta vaskolante rua. Identifika ona suspeitu sira, maibé seidauk bele ka’er, tanba kazu ne’e nu’udar kazu krime ona ne’ebé sei persija mandadu kapturasaun mak foin bele ka’er sira,” hatete Mauluta via kontaktu telemovel ba Tempo Timor, Segunda (07/05).

“Ami sei investiga hela kazu ne’e, tanba partidu FRETILIN hala’o hela mini kampaña iha Waitame, no kazu ne’e akontese iha suku Makadiki,” esplika Mauluta.

Entretantu, Sekretariu Jeral Partidu FRETILIN, Mari Alkatiri konsidera akuzasaun Xanana nian nakonu ho lia falsu, maibé kona – bá kazu krime sira ne’ebé durante ne’e inklui suku Makadiki (Vikeke), Venilale (Baukau) no suku Maina (Lautem), Alkatiri katak husik polisia hala’o prosesu investigasaun. 

  

Militante AMP hosi suku Maina 1, Lautem. 

“Ha’u lakohi hatan provokasaun sira ne’e. Komesa ohin ha’u hatete ha’u la hatan ba provokasaun, tanba ha’u blokir tiha ona,” hatete Alkatiri liu hosi konferensia imprensa iha CCF, Komoro – Dili, Segunda (07/05). (Oki)