“Sim, funsionária Públiku ne'ebé uza ona direitu reforma ne'e, ita rejista hamutuk na’in-845, hahú husi tinan 2012 to’o ohin loron, husi ne’e 99% sira ho idade 60 ba leten, ne’ebé mak ho inisiativa rasik hato’o rekerimentu, aprezentasaun no hetan aprovasaun husi KFP nomós hetan atensaun liuhusi Institutu Nasionál Seguransa Sosiál (INSS)”, dehan Prezidente KFP, Faustino Cardoso, bainhira atualiza relatóriu ba Primeiru Ministru (PM), Taur Matan Ruak iha Rezidénsia PM Farol, Tersa (26/07).
Funsionáriu públiku ne'ebé dadaun ne'e ativu hamutuk na’in-3.465 mak ho idade tinan-60 ba leten.
Nune'e situasaun ida-ne’e sai delikada tebes, bainhira liga ho ministériu sira, ne’ebé maioria sira ho idade ne’e.
“Ita presiza atu haree ho didi’ak, karik idade reforma ita hatuur, presiza iha planu ida di’ak, atu nune’e labele hamosu vakatura, ba profesór sira ne’ebé mak sei foti urjénsia aprendijazen, bele fó risku ba joven sira ne’ebé mak eskola hela”, dehan nia.
Maske nune'e, prezidente KFP nafatin agradese ba sira-nia kontribuisaun durante ne'e, nune'e mós ho inisiativa rasik deside atu tama reforma, hodi goja sira-nia restu vida hamutuk ho família
Mesmu seidauk iha lei reforma obrigatória, maibé sira ho inisiativa rasik la obriga-an, maski serbisu nafatin ho idade tinan-60 ba leten ona. (*)