“PR hanesan embaixadór númeru 1 rai nian ba halo diplomasia, fera ulun ho Prezidente uma-na'in kona-ba ideia saída tan mak ita-bele halo hamutuk, mais Governu mak halo desizaun implementasaun, e ba ho ministru hanesan Ministra Negósiu Estranjeiru no Kooperasaun, Ministru Transporte no Komunikasaun, Ministru agrikultura no peskas, Ministru Koordenadór ba Asuntu Ekonomiku, e iha deputadu ne'e mós hanesan ha'u hanoin kuandu Xefe Estadu halo vizita lori deputadu, se mak ba, Parlamentu mak bele deside, ne'e para orgaun tolu ne'e akompaña polítika estadu nian”, dehan Horta, iha sala VIP Aeroportu Internasionál Komoro, Dili, segunda (25/07).

Dadauk vizita ne'ebé halo ba Indonézia ne'e tuir politika estadu ne'e halo desde tinan-20 nia-laran, wainhira iha prezidente foun no Primeiru Ministru foun, sempre halo viajen dahuluk ba Indonézia.

“Ida-ne'e polítika ke halo dezde uluk kedas ne'e duni tuir resposta konvite formál maihusi Prezidente Indonézia, Jokowi Dodo, ha'u ba ho delegasaun Governu”, dehan nia.

Tanba ne'e, estadu nia vizita hanoin presiza hetan akompaña husi Governu ne'e hanesan mós iha rai seluk bainhira Prezidente ba vizita iha estranjeiru nunka ba mesak, tanba Governu mak bele iha kompeténsia atu trata asuntu balun.

Nune'e vizita estadu nian ba Indonézia ne'e la'o di'ak loos tanba Prezidente Jokowi Dodo rasik akompaña di'ak situasaun no evuluasaun iha Timor, no kontente ho relasaun bilaterál ne'ebé dadaun ne'e iha.

Durante iha vizita né'e, Prezidente Indonézia mós fó ideia balun ba delegasaun, hanesan Prezidente Repúblika no membru Governu sira ne'ebé partisipa iha enkontru bilaterál ne'e, kona-ba saída tan mak atu halo iha futuru.

Maske buat balun atu halo andamentu ne'e nu’udar segimentu ba akordu ne'ebé Governu asina, maibé ba buat balun ideia foun ne'e sei tur hamutuk ho Primeiru Ministru no Governu hafoin haree komisaun interministeriál atu halo segimentu ba ida-ne'e. (*)