Tuir informasaun ne’ebé www.tempotimor.com , asesu iha pájina MAE, sesta (22/07) katak, enkontru ne’ebé hala’o iha salaun VIP MAE, Ministru Miguel iha nia intervensaun hatete, tinan-tinan Parlamentu Nasionál persiza aprova lei 2 mak primeiru Lei Grande Opsaun Planu no segundu mak Lei Orsamentu Jerál Estadu, tanba lei enkuadramentu Orsamentu ne'e preve katak wainhira atu prepara Orsamentu ida sei hahú uluk ho preparasaun planeamentu.

“Munisípiu sira ohin loron implementa ona kompeténsia Governu Sentral Dezkonsentra iha dominu oioin, Saúde, Edukasaun no sira seluk tan, halo ita-boot sira mós sai implementadór ba área estratéjiku sira seluk, dezenvolvimentu setór Saúde, Edukasaun no sira seluk tan. Estadu iha ona Lei Grande Opsaun Planu, lei ida ne'ebé mak preve área estratéjiku sira ho nia objetivu maibé Parlamentu Nasionál wainhira aprova lei ida-ne'e limita mós tetu fiskal ba tinan oin nian”, dehan Ministru Miguel.

Partisipa iha reuniaun ne'e, Diretor Jerál Administrasaun Finansas, Diretor Jerál Desentralizasaun Administrativa, Diretór Jerál Dezenvolvimento Rurál, Diretór PDIM, Prezidente Autoridade Munisípiu no Administradór Munisípiu sira hotu hamutuk ho nia ekipa sira. (*)