“Di'ak, primeiru atu fó hatene ba komunidade tomak iha rai ketan (Oekussi) ida-ne'e katak vizita ha'u-nia mai ne'e, primeiru mai hakarak atu implementa programa Governu nian, ida ne'ebé mak bolu dehan Governu iha komunidade nia let. Entaun ami mai iha ne'e iha sub-rejiaun tolu ne'ebé mak ami hili ida mak Sub-rejiaun Pasabe, ne'e mak suku Malelat e ida mak iha sub-rejiaun Oesilu nian, ne'e mak Bobometo e depois tuir fali mai mak iha sub-rejiaun Nítibe ninian mak iha Benu-ufe”, dehan nia bainhira halo entrevista ho Rádiu Komunidade Atoni Liafau, iha Santa-Rossa, Oekussi, tersa (19/07).

Maibé Programa Governu iha komunidade nia-leet ne'ebé mak implementa husi MAPKomS ne'e fahe ba atividade-rua, ida mak atividade Naroman Ba Suku nomós atividade seluk ko'alia kona-ba sentru informasaun iha suku ne'ebé dook liuhosi sidade.

Programa Governu iha komunidade nia let ne'e ninia prinsípiu mak hakarak atu halo diálogu ho komunidade, hodi hatene saida mak komunidade sira-nia susar, no saída mak sira-nia presiza nomós buka hatene saida mak komunidade sira iha.

Tanba ko'alia kona-ba dezenvolvimentu ne'ebé prevee iha programa Nasionál ne'e povu no ema mak sai sentru dezenvolvimentu entaun presiza tun ba ko'alia ho sira no koiñese di'ak sira no hatene saida mak sira iha no saida mak sira laiha.

“Ami hakarak hili suku sira ne'ebé iha área remota. Entaun ida-ne'e mak prinsípiu Governu nian nomós ami-nia programa husi MAPKOMS ne'ebé mak ha'u lidera, ami mai iha ne'e atu hatene ida-ne'e liliu hasoru-malu ho suku sira”, hatetre nia.

Tanba ne'e, MAPKOMS sei halo vizita ba fatin sira ne'e hotu, atu haree nune'e atu ko'alia ho komunidade atubele hatene saida mak sira iha. Tanba suku balun potensiál tebtebes maibé hela iha área rurál no ema ladun hatene.

“Entaun ami atu loke dalan atu-nune'e izolamentu ne'e labele iha, para komunikasaun ba fatin hotu ne'e bele di'ak nomós joven sira atu book-an atu projetu sira-nia suku rasik ba futuru ne'e halo nusa mak bele dezenvolve potensiál sira ne'ebé iha sira nia suku”, afirma nia. (*)