“Ajenda Prezidente Repúblika, José Ramos-Horta, loron, segunda-feira, 18 Jullu 2022, oras 13:00-Prezidente Repúblika, José Ramos Horta, ho delegasaun sei desloka ba Repúblika Indonézia. Mak ne'e de'it, informasaun ne'ebé hakarak fahe ba kolega sira. Obrigadu”, informasaun ne’ebé ne'ebé www.tempotimor.com asesu husi Gabinete Prezidente Repúblika, domingu (17/07).

Iha loron tersa (12/7), Parlamentu Nasionál (PN) deside aprova pedidu husi Prezidente Repúblika (PR), José Ramos Horta ne’ebé husu autorizasaun atu halo vizita ba Nasaun Repúblika Indonézia.

Maske durante iha prosesu diskusaun to’o iha aprovasaun ba pedidu refere, laiha deputadu ida mak fó komentáriu ruma maibé meza PN deside prosede diretamente ba votasaun.

Nune’e rezultadu votasaun ba pedidu refere, hetan votu afavór 60 kontra 0 no abastensaun 0, no deputadu 5 mak aujente iha plenária.

“Pedidu aseitasaun ba deklarasaun PR vizita ba Indonézia, aprovadu”, dehan Prezidente Parlamentu Nasionál, Aniceto Longuinhos Guterres Lopes, hafoin anúnsia rezultadu votasaun iha Plenária PN, tersa (12/07).

Parlamentu Nasionál mós simu ona pedidu husi Prezidente Repúblika (PR), José Ramos Horta ne’ebé mak konvida Bankada Parlamentár sira iha Parlamentu Nasionál (PN) atu nomeia sira-nia reprezentante kada ema na’in-ida hodi akompaña Xefe Estadu vizita ba Repúblika Indonézia.

“Iha vizita Prezidente Repúblika nian ne'e mós halo konvite ida mai iha Parlamentu Nasionál atu oinsá bele nomea mós reprezentante Bankada ida-idak hodi bele inklui iha delegasaun Prezidente Repúblika nian ba Indonezia”, dehan Sekretária Meza Parlamentu Nasonál (PN), Lídia Norberta, iha PN, kuarta (06/07).

Tanba ne’e, Prezidente PN mós informa ba Líder Bankada sira atu Bankada hothotu prepara nia reprezentante.

Iha konstituisaun RDTL artigu 8 mós hatete Prezidente Repúblika iha kompeténsia ba relasaun internasionál sira, ne'e siknifika iha nesesidade tomak atu xefe estadu vizita estadu ba estranjeiru.

Mesmu Prezidente Repúblika anterior, Francisco Guterres ‘Lú Olo’ mosu buat balun mak halo fora husi normál no la tuir konstituisaun maibé situasaun ne'e la siknifika akontese fali ba Prezidente atuál.

Dalaruma, haree ba ema ida-idak nia sentidu ba Estadu, balun iha kostura lahanesan tanba kostura balun, dehan laloos no balun dehan loos.

Ba buat ne'ebé dalaruma tenke tau iha oin mak Prezidente Repúblika sé de'it atu viajen ba rai-liur ne'e la'ós tanba nia hakarak maibé ne'e kompromisu estadu nian.

“Dala ruma ba Bankada ida-idak nian lahanesan, iha parte balun dehan laiha no balun dehan sim, ne'e tanba ita haree relevansia ne'e, Prezidente anterior sira to’o iha Prezidente atuál bainhira iha vizita ba rai-liur ida-ne'e importante, agora maneira atu responde mak laloos, maneira ida ne'ebé mak sala”, esplika nia. (*)