Print this page

CNC Agradese Líder Sira Kontinua Tane-As Lian Husi Sobrevivente

Diretór Ezekutivu CNC, Hugo Maria Fernandes. Diretór Ezekutivu CNC, Hugo Maria Fernandes. Foto Tempo Timor

Tempotimor (Dili)-Sentru Nasionál Chega (CNC) hato'o agredesimentu ba líder na'in-tolu hanesan Prezidente Repúblika (PR), José Manuel Ramos Horta, Kay Rala Xanana Gusmão no Mari Bim Amude Alkatiri inklui mós líder sira seluk ne'ebé durante ne'e kontinua tane-as lian husi sobrevivente sira iha Timor-Leste.

“Dala-ida tán hodi naran CNC nian, ho ekipa ezekutivu tomak ne'ebé mak servisu iha CNC tinan-lima hakarak agradese ba na'in Prezidente Repúblika, ba Maun Boot Xanana, no ba Doutor Alkatiri, nomós ba ita-nia líder sira hotu ne'ebé durante tinan-22 kontinua la husik monu lian husi sobrevivente sira”, dehan Diretór Ezekutivu CNC, Hugo Maria Fernandes iha ámbitu komemora Aniversáriu CNC ba dala-lima iha eis-Komarka Balide, sábadu (16/07).

Ba Aniversáriu ne'ebé mak CNC hala'o iha tinan 2022 ho tema (justisa tranzitóriu hodi dignifika sobrevivente sira), ne'ebé mak hetan mós previléjiu boot tanba hetan partisipa direta husi Prezidente Repúblika hodi kontinua hatudu ninia apoiu desde hari’i CNC husi 2017 to'o ohin loron.

Ho apoiu ne'ebé Prezidente Repúblika fó la'ós de'it iha tinan-lima depois CNC hari’i, maibé apoiu ne'e hahú kedas sei asume kargu Ministru Negósiu Estranjeiru, hamutuk ho Kay Rala Xanana Gusmão inklui Doutor Mari Alkatiri.

“Imi na'in-tolu mak foti desizaun ida, para Timor atu haree ba kotuk antes hakat ba oin, imi na'in-tolu nia vizaun transforma ba liuhusi Komisaun Simu Malu Lialoos no Rekonsilasaun, Timor-Leste halo ida-ne'e nu’udar jestu ba responsabilidade ida atu fó hatene ba ita-nia komunidade nomós ba mundu saída mak akontese iha Timor”, dehan nia.

Prezidente Repúblika, José Manuel Ramos Horta hatete, durante ne'e sempre ativu iha serimónia no reuniaun sira hahú kedas tempu Komisaun Rekonsilasaun no Verdade Aceh (CAVR) ho Komisaun Verdade no Amizade (CVA) mai to'o iha hari’i Centru Nasionál Chega.

“Hanesan Diretór Hugo hatete ha’u nunka falta eventu ruma iha ne’e hahú kedas tempu Komisaun Rekonsilasaun no Verdade Aceh (CAVR) ho Komisaun Verdade no Amizade (CVA), ha'u nunka falta enkontru-reuniaun ida”, hatete Xefe Estadu.

Dala-barak reuniaun sira ne’e hanesan sempre partisipa no nunka falta tanba dahuluk haree no respeita ba elementu sira ne’ebé servisu iha inisiativa sira ne’e. (*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items