Tuir informasaun ne’ebé www.tempotimor.com, asesu husi pájina José Ramos Horta, sábadu (16/07) katak, enkontru kortezia ne’e hala’o iha Salaun CPLP, Palásiu Prezidente Nicolau Lobato, ho objetivu atu entrega ba Prezidente Repúblika kuadru ida ne’ebé pinta no borda ho ai-funan husi kada nasaun ne’ebé iha misaun reprezentante iha Timor-Leste.
Tanba kuadru ne’e suku husi Señora Teresa, Timoroan ida ne’ebé iha limitasaun fízika (ema ho kondisaun defisiénsia).
Komitiva ne’e kompostu husi, Espoza Embaixadór Brazil, Espoza Embaixadór Uniaun Europeia (EU), Espoza Embaixadór Indonézia, Espoza Embaixadór Nova Zelándia, nomós Señora Tereza.
Iha vizita ida-ne’e, Prezidente Repúblika esplika oitoan kona-ba ninia vizaun ne’ebé liga ho polítika sosiál, iha ámbitu programa kombate mánutrisaun no pre-eskolár, nune’e mós programa “green canten” ka kantina verde hodi fó hahán bikan ida ba labarik sira, nomós apoiu nutrisaun ba inan isin-rua sira.
Tanba inisiativa ne’e hetan suporta maka’as husi United Nations International Children's Emergency Fund (UNICEF), nune’e mós husi parte Governu.
Prezidente Repúblika mós ko’alia kona-ba importánsia husi hafoun plantasaun kafé iha Timor-Leste laran, projetu ne’ebé hahú ona lansa iha Munisípiu Ermera ho partisipasaun Prezidente Repúblika, Primeiru Ministru no membru Governu sira.
Kona-ba estabelesimentu unidade ida hodi haforsa ekonomia feto, unidade ne’ebé hahú serbisu iha Palásiu Prezidensiál, hodi buka meius atu apoiu feto sira ne’ebé hasoru dezafiu ekonómiku sira, nune’e mós fó apoiu ba feto sira ne’ebe hakna’ar nu’udar “tiga roda” ho sustentabilidade.
Iha ámbitu atu finansia projetu ne’ebé atu implementa, sei halo esforsu hodi sira hetan finansiamentu husi doadór privadu sira husi Austrália no Alemaña.
Maibé, halo ezersísiu boot iha korte ba kustu deznesesáriu sira, hanesan per diem ba viajen iha rai laran no ba rai liur, redusaun no ko’a saláriu boot sira husi funsionáriu no Asesór Palásiu Prezidensiál sira, nomós ko’a iha sosa karreta operasionál. Osan sira ne’e mak sei uza hodi reforsa finansiamentu ba projetu hirak ne’e.
Vizita ne’e taka ho Prezidente Repúblika akompaña komitiva ba vizita estalasaun Jardin Infánsia ba atividade estrakurikulár iha Palásiu Prezidensiál, ne’ebé loke iha mandatu dahuluk, maibé hetan suspensaun husi susesór sira, dadaun reativa hikas iha ninia segundu mandatu. (*)