Ministru Prezidénsia Konsellu Ministru, Fidelis Leite Magalhães hatete, Konsellu Ministrus autoriza Ministru Agrikultura no Peskas hodi asina memorandu entendimentu kona-ba kooperasaun agríkola ho Ministériu Agrikultura no Peskas Indonézia nian.
“Ho objetivu atu haluan kuadru ezistente kooperasaun bilaterál setór agríkola, inklui área téknika no sientifika sira”, informa Ministru Fidelis iha Pálasiu Governu, kuarta (13/07).
Nune’e Ministru Turizmu, Komérsiu no Indústria, José Lucas do Carmo da Silva, simu autorizasaun husi Konsellu Ministrus hodi asina memorandu entendimentu rua ho Governu Indonézia, ida iha área komérsiu nian no ida seluk kona-ba padronizasaun, avaliasaun konformidade no metrolojia.
Entretantu Konsellu Ministrus autoriza mós Ministru Transporte no Komunikasaun, José Agustinho da Silva, hodi asina memorandu entendimentu ida ho Ministériu Transporte Repúblika Indonézia nian kona-ba Movimentu Transfronteirisu Autokaru Komersiál.
“Memorandu ida-ne’e atu apoia komérsiu transfronteirisu no kooperasaun entre nasaun rua ne’e, ne’ebé permite hodi promove, dezenvolve no reforsa komérsiu, investimentu, turizmu no interkámbiu kulturál entre nasaun rua ne’e, liuhusi estabelesimentu sistema transporte integradu ida no efisiente neébé sei aptu hodi insentiva kreximentu no dezenvolvimentu ekonómiku iha Timor-Leste, maske hanesan ho benefísiu ba Indonézia”, dehan nia.
Ministru Transporte no Komunikasaun simu autorizasaun husi Konsellu Ministrus hodi asina memorandu entendimentu entre ninia ministériu no Ajénsia Meteorolojia, Klimatolojia no Jeofízika Repúblika Indonézia kona-ba kooperasaun iha domíniu meteorolojia, klimatolojia no jeofízika.
Parseria ne’e prevee iha memorandu ida-ne’e, atu apoiu dezenvolvimentu meteorolojia, klimatolojia no jeofízika, setór importante ba Timor-Leste, liuliu iha área sira hanesan kalibrasaun ekipamentu meteorolojia no sismolójiku no kapasitasaun rekursu umanu sira.
Konsellu Ministrus autoriza Ministru Transporte no Komunikasaun, hodi asina memorandu entendimentu ida ho Ministériu Komunikasaun no Informátika Repúblika Indonézia, ba kooperasaun iha domíniu komunikasaun no informátika.
Tanba ne’e, haluan no hadi’a setór komunikasaun no informátika implika kolaborasaun ho nasaun sira seluk hodi nune’e, ho forma ida ne’ebé proativa no asertiva, sira rua bele aumenta ninia efikásia atuasaun interna no esterna no iha sentidu ida-ne’e presiza atu estabelese baze koordenasaun no kooperasaun bilaterál iha kampu komunikasaun no informátika. (*)