“Primeiru, nu'udar líder, nu’udar mós aman ba nasaun, ita haree ita-nia joven sira nadodon loroloron ba ema-nia rai, ita-bele dehan katak joven mak futuru nasaun nian, maibé sira ba e ema seluk mak tama fali, ne'e problema ida Governu ninian ke tenke haree. Labele foin dadauk ita rona dehan ita-nia oan sira, joven sira iha Portugal toba iha dalan ninin sira ne'e, uma tatis sira ne'e, laiha dignidade”, dehan nia hafoin audénsia ho Prezidente Repúblika, José Ramos Horta iha Palásiu Prezidensiál, kinta (14/07).

Maske inisiativa husi joven sira ne'e di'ak no la'os la di'ak, tanba joven sira sai ba rai-liur, importa osan mai Timor-Leste. Maibé Governu tenke haree oinsá mak joven sira ba ho dignidade, hela iha ema nia rai ho dignidade no fila mós ho dignidade.

Atu rezolve situasaun ida ne'e, maka presiza uha akordu espesiál ida entre governu Timor-Leste ho Governu Portugál, ne'ebé mak nia modelu hanesan ho akordu ne'ebé mak Governu halo ho Governu Austrália no Korea Súl.

Nune'e mós líder rejisténsia iha Timor-Leste na'in-tolu ka na'in-haat sei iha, sira mak aman ba nasaun, tenke responsabiliza tanba saida mak joven sira rihun ba rihun kontinua nadodon ba rai-liur, maibé metin hotu iha Portugal, toba iha uma tatis tanba serbisu laiha, osan laiha.

“Joven sira sai, ema seluk tama, sira haruka osan mai, ema seluk lori sai ba liur, buat sira ne'e hotu”, dehan nia.

Ba kazu tráfiku umanu ne'e, Governu tenke husu responsabilidade ba ajénsia sira nomós ba sira ne'ebé fa'an billete.

“Tenke husu Responsabilidade sé la'e ita lakontrola neneik ita bele monu ba dehan tráfiku umanu, krime organizadu e komesa hahú ona”, hatete nia. (*)