“Señor Prezidente, ha'u hanoin iha Hera ne'ebá, edifísiu kuandu loos tiha, ha'u hakarak tau ita-boot nia naran iha uma nia oin ne'e, tau Aniceto Longuinhos Guterres Lopes”, dehan Deputada Oinda iha ámbitu diskusaun ba projetu rezolusaun númeru 100/V(4a) kona-ba lokalizasaun edifísiu foun, iha plenária PN, tersa (12/07).

Bankada KHUNTO ko'alia ne'e desizaun atu hari’i edifísiu ne'e Prezidente PN mak ka'er, tanba ne'e kuandu edifísiu ne'e finaliza tenke tau naran Aniceto.

“Tau ita-boot nia naran iha ne'ebá para ema hotu haree ita-boot nia esforsu tomak hodi halo edifísiu iha ne'ebá”, afirma nia.

Iha ne'e, Bankada KHUNTO mós la'ós defende kona-ba planu muda lokalizasaun edifísiu PN tenke tau iha Hera tanba deputada hela iha ne'ebá ne'e laloos.

“La'ós dehan ha'u-nia rai iha Hera be tenke muda ba Hera la'e, maibé ha'u hakarak ne'e iha Hera, tanba rai foin hatudu dada'uk ne'e, ha'u mós iha ne'ebá haree rai ne'e luan tebtebes”, esplika nia.

Hatan ba kestaun ne’e Prezidente Parlamentu Nasional, Aniceto Longuinhos Guteres Lopes hatete, nia parte sei la hatán atu uza nia naran ba edifísiu PN foun, maibé importante mak nafatin esforsu ho seriedade atu hari’i duni edifísiu refere.

“Sé ha’u mate karik mak ita-boot sira ba tau ha’u-nia naran tau ba, mais enkuantu ha’u sei moris ne’e ha’u sei la tau ha’u-nia naran iha fatin ruma. La presiza ita hakerek naran ruma maibé ita sériu para, ha’u hein katak Governu la muda ona nia desizaun”, hatete nia.

Kona-ba lokalizasaun edifísiu foun ne'e ko’alia diretamente ona ho Primeiru Ministru, Taur Matan Ruak, no nia aseita no apoia, tanba ne'e hein de'it atu formaliza de'it. (*)