Login to your account

Username *
Password *
Remember Me

Mobiliza Tais-Na'in Sisi Governu, FRETILIN Akuza Deputada CNRT Buka Votu

Deputadu Bankada Frente Revolusionáriu Timor-Leste no Independente (FRETILIN), Antónino Bianco. Deputadu Bankada Frente Revolusionáriu Timor-Leste no Independente (FRETILIN), Antónino Bianco. Foto Suplay

Tempotimor (Dili)-Deputadu Bankada Frente Revolusionáriu Timor-Leste no Independente (FRETILIN), Antónino Bianco, akuza deputada Bankada Congresso Nacionál de Reconstrução de Timor (CNRT), Lusia Taeki, buka votu tanba mobiliza soru-na'in sira husi Rejiaun Administrativa Espesiál Oekussi Ambeno (RAEOA) hodi sisi Governu  fó fila sira-nia tais.

“Tuir loloos Governu sosa balun maibé balun ba mobiliza politiza fali iha ne'e, ne'e mak problema boot. Rona, tais ne'e nia folin la barak ida, ne'e bele sosa, maibé balun ba kala hakilar ida-ne'e, hodi hanesan buka saida mak ne'e, buka votus karik, mais la'ós fatin ida-ne'e”, dehan Deputadu Bianco iha plenária PN, tersa (12/07).

Ba situasaun hirak ne'e, simples tanba tais hamutuk 300 ne'ebé la konsege lori ba expo-2020 iha Dubai ne'e la'ós Oekussi nian de'it, maibé ne'e husi munisípiu 12 nian hotu.

Iha momentu ne'eba tais hirak ne'e lakonsege lori ba tanba impede husi situssun COVID-19 tanba ne'e deputadu sira lalika ko'alia lori povu nia naran tanba Governu mós iha hanoin atu sosa balun.

“Ita promove duni tais maibé COVID-19 ema rai seluk labele simu, eh la simu, ne'e mak regra. Covid ne'e mundiál, maibé tais oan ne'e la folin barak ida, sosa, Governu bele sosa e parlamentu bele buka hatete, ha’u mós hakarak sosa, sé hakarak fa'an iha ne'e”, afirma nia.

Ba preokupasaun ne'e, iha loron 7 fulan-jullu 2022, Parlamentu Nasionál rasik simu ona karta esklaresimentu ida husi Sekretáriu Jerál Autoridade Nasionál ba Expo Dubai Timor-Leste (ANED-TL), Manuel Vong ne'ebé mak ko'alia kona-ba grupu soru-tais sira ne'ebé organiza husi deputada Lusia hodi ba krítika ANED Timor-Leste iha Ministériu Turizmu ho Komérsiu no Indústria (MTKI).

Iha karta ne'e rasik hatete Bomdia sua exelénsia Prezidente Parlamentu Nasionál, update informasaun no husu Prezidente PN nia intervensaun ruma, hodi salva guarda prosesu investimentu estratéjia rezultadu husi expo-2020 Dubai.

“Informa ba Prezidente katak horseik, 6 de setembro 2022, tuku 14, lokraik iha distinta deputada Parlamentu Nasionál ho naran, señora Lusia Taeki, husi Bankada CNRT mai iha sekretária ANED Timor-Leste, protesta kona-bá tais Oekussi lakonsege lori ba Expo-2020-Dubai”, konteudu husi karta refere.

Grupu ne'ebé mak esplika ona mak grupu tais-na'in sira ho señora deputada hatete katak Parking List, hatete aprovasaun husi dubai tanba Pandemia Covid-19 aumenta iha fulan-novembru-dezembru 2021, no esplikasaun detallu e anexu.

Grupu mós hato'o katak Governu liuhusi Ministériu Turizmu ho Komériu no Indústria, para ANED Timor-Leste halo promusaun ba tais husi munisípiu hotu nian, la'ós de'it husi Oekussi.

Ministru Turizmu Komérsiu no Indústria fo ona orientasaun atu buka meiu no posibilidade atu sosa tais ne'e balun hodi kontinua halo promusaun no asuntu ne'e iha ona prosesu nia laran.

Grupu mós esplika katak Governu liuhusi MTKI no ANED Timor-Leste, halo kna'ar, halo promusaun ba investimentu iha área estratéjiku ba rekooperasaun ekonómiku nasionál.

Husi esklarisemtu ne'ebé mak Prezidente Parlamentu Nasionál simu ne'e, FRETILIN hanoin katak Governu mós defende tenke promove no sosa tais ida-ne'e.

Maibé situasaun ne'e to'o la hetan solusaun tanba balun mobiliza tais-na'in sira ne'e husi Oekussi, ida-ne'e mak problema boot.

Vise Xefe Bankada CNRT, Patrocino Fernandes hatete, kona-ba kestaun tais ne'e, la'ós tanba la konsege lori ba estranjeiru mak Governu lori mai fó tiha fali ba na'in, maibé tuda fali ba ema-ruma mak mobiliza fali tais-na'in sira hodi ba sisi, ida-ne'e mak halo CNRT lamenta.

“Sé nu’udar reprezentante povu ida, povu ne'e mai hato'o ninia aspirasaun ne'e depois reprezentante ne'e labele ko'alia sai ida-ne'e ga. ne'ebé ha'u hanoin deklarasaun polítika ida hanesan ne'e, lamentavél tebtebes, ba hasoru situasaun povu nian”, afirma nia.

Deputada Lusia Taeki hatete, nia pare seidauk ko'alia kona-ba lia-fuan la rezolve tais, maibé nia kritika Governu tanba kontinua abandona, maske nia rasik mak levanta ona asuntu refere iha fulan-maiu.

“Ha'u la'ós dehan la rezolve, ha'u foti asuntu ne'e iha fulan-maiu, bee ita-boot sira foin hakfodak rezolve. Nusa mak fó fali, ne'e mak rezolve”, dehan nia.

Ko'alia kona-ba buka votu, ida-ne'e husu ba deputadu bankada FRETILIN, Antonino Bianco, bele husu no ko'alia direta ba povu liliu soru-na'in sira iha baze. (*)

Rate this item
(1 Vote)
Last modified on Wednesday, 13 July 2022 09:44
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« October 2022 »
Mon Tue Wed Thu Fri Sat Sun
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Tempo Timor Networks

Online Counter