Tuir ajenda númeru 372/V(4a) kona-ba reuniaun plenária loron tersa (12/07) katak Parlamentu Nasonál sei iha periodu orden ba loron ohin, atu diskute hikas pedidu ne'ebé antes ne'e la konsege halo diskusaun no aprovasaun.
“Ajenda númeru 2, halo debate aseitamentu ba deklarasaun husi Prezidenté Repúblika vizita ba Estadu Repúblika Indonézia”, deklara ajenda ne'ebé www.tempotimor.com asesu husi relasaun públika iha Parlamentu Nasionál, tersa (12/07).
Antes ne'e Parlamentu Nasionál (PN) deside kumpre desizaun Bankada FRETILIN nian hodi kansela debate pedidu vizita husi Prezidente Repúblika (PR), José Ramos Horta ba Repúblika Indonézia maibé adia filafali ba loron seluk.
“Ajenda diskusaun ba aseitamentu dezlokasaun Prezidente Repúblika nian meza adia, tanba pedidu mai husi bankada Fretilin”, dehan Prezidente Parlamentu Nasionál, Aniceto Longuinhos Guterres Lopes, iha Plenária PN, kinta (07/07).
Ba pedidu husi PR Horta ne'e tempu sei iha atu Parlamentu Nasionál bele diskute maibé tarde liu iha loron 13 jullu tenke iha rezolusaun ona, tanba viajen vizita sei hahú iha loron 18 jullu 2022.
Maibé parte husi Xefe Bankada Fretilin, Deputadu David Dias Ximenes 'Mandati' husu atu adia, oinsá mak kontribui di’ak liuba desizaun, ida-ne'e meza autoriza adia. (*)