“Ho ida-ne'e distintu deputadu, Parlamentu Nasionál Ratifika ona instrumentu haat, ne'ebé ohin ita diskute ho Rezolusaun númeru 18, 19, 20 no 21 husi Parlamentu Nasionál”, dehan Prezidente Parlamentu Nasonál, Aniceto Longuinhos Guterres Lopez, hafoin anúnsia rezultadu votasaun iha Plenária PN, kinta (07/07).

Ba aprovasaun ida-ne'e, Meza PN hakarak hato'o agredese ba Ministru Justisa, ho Vise Ministru Negósiu Estranjeiru no Kooperasaun, nomós ba deputadu sira hotu nia partisipasaun ho kontribuisaun ba ratifikasaun tratadu sira ne'e.

Rezultasaun votasaun ba Proposta Rezolusaun númeru 18/V (4a) ne'e ho votu afavor 54, kontra no abstensaun laiha, inklui proposta Rezolusaun númeru 19/V (4a), 20/V (4a) nomos 21/V (4a), hetan votu afavór 55, kontra no abstensaun laiha.

Ba Rezolusaun númeru 18/V (4a) ne'e Ratifika akordu kona-ba previléjiu sira no imunidade tribunál penal Internasionál, ho efeitu Nova Iorke iha loron 9 setembru 2002.

Nune'e mós Rezolusaun númeru 19/V (4a) ne'e Ratifika Alterasaun ba artigu 8 inklui Alterasaun ba Estatutu Roma Tribunál Penál Internasionál relativa krime agresaun adotada ba konferénsia Revizaun iha Kampala 31 maiu no 11 juñu 2010.

Ba Rezolusaun númeru 20/V(4a) Ratifika Alterasaun artigu 124 kona-ba Estatutu Roma Tribunál Penál Internasionál adotada Haia 26 Novembru 2015, inklui Proposta Rezolusaun númeru (21/V (4a) ratifika adezaun Akordu kona-ba previléjiu no imunidade sira husi Tribunál Penál Internasionál diretu do Mar, adotada iha 23 maiu 1997. (*)