“Hakarak foti mós kestaun ida ne'ebé mak ohin señor deputadu sira levanta kona-ba  indisiplinadu fó liafuan 'bilán' ba ita-nia membru Governu sira. Ha'u hanoin CNRT ne'e matenek loos iha Timor-Leste la podia hasai liafuan sira ne'e ba membru Governu sira, sa tan nia mós reprezenta Estadu ou Governu ida mai tur hanesan iha uma fukun ida ne'e”, dehan nia iha Plenária PN, kinta (07/07).

Ho liafuan la edukativu ne'e PLP haree hanesan CNRT nia ema mak matenek liu ona iha Timor-Leste maibé loloos CNRT mós tenke fó  ezemplu di'ak ba  partidu foun sira, la'ós hasai fali liafuan máedukadu, laiha disiplina ida ba iha membru Governu ida ne'ebé tur hela iha deputadu sira-nia oin.

Maibé Vise Xefe Bankada CNRT, Patrocino Fernandes, husu deskulpa ba membru Governu ne'ebé mak karik hetan ofende relasiona ho intervensaun husi deputadu CNRT.

“Nu’udar responsavel bankada, lori bankada nia naran atu dehan karik intervensaun sira husi deputadu ninian hanesn ofende membru Governu karik, ami husu deskulpa”, dehan nia.

Tanba atu evita situasau ida-ne'e, mak Bankada CNRT hakarak husu mós ba deputadu sira seluk tenke para ona ho liafuan no intervensaun sira ne'ebé soke malu bebeik liga ba naran partidu nian.

“'Ida-ne'e de'it mak ha’u atu husu, tanba deputadu sira iha idaidak ninia diretu aseguradu iha rejimentu, hanesan mos estatutu deputadu atu halo ninia intervensaun sira. Tanba  ne'e mak intervensaun deputadu sira nia ita lalika jeneraliza lori ba soke iha partidu para depois halo ita labele konsege sustenta polítika ida di'ak iha ita-nia Parlamentu ne'e”, esplika nia. (*)