Projetu Proposta Lei ne'e aprezenta direita husi Ministru Prezidénsia Konsellu Ministru, Fidelis Manuel Leite Magalhães, hodi halo diskusaun no aprovasaun iha KM.

“Ha’u rasik ohin propoin, aprezenta ba Konsellu Ministru proposta lei ida, atu halo autorizasaun lezilativa husi Parlamentu Nasionál hodi Governu bele aprova dekreitu lei ba determinasaun limite idade ba relasaun servisu funsionáriu públiku nian no ajente administrativu nian”, informa Portavoz Governu, no Ministru Prezidénsia Konsellu Ministru, Fidelis Manuel Leite Magalhães, iha Palásiu Governu, kuarta (06/07).

Governu hakarak ho projetu Proposta Lei katak Parlamentu Nasionál fó autorizasaun hodi fiksa limite idade hanesan kauza atu remata kontratu serbisu iha Administrasaun Públika.

Bainhira atinje limite idade, funsionáriu públiku no ajente administrativu sira sei bele reforma no husu ninia pensaun vellise.

“Tanba tuir konstituisaun ba materia hirak ne'e, Governu sei presiza hetan autorizasaun husi Parlamentu Nasionál, antes Governu avansa ho inisiativs rasik liuhusi forma dekretu lei. Tanba ne'e mak ohin KM  diskute no deside katak Governu sei hato'o proposta autorizasaun ida-ne'e ba Parlamentu Nasionál”, afirma nia.

Projetu Proposta Lei ida-ne'e ho objetivu atu estabelese mekanizmu ne'ebé nesesáriu hodi permite rejuvenesimentu (sai joven liu) husi profisionál sira Administrasaun Públika nasionál nian, ne'ebé posibilita lori kompeténsia foun ba funsionalizmu públiku. Renovasaun ba kuadru sira iha Administrasaun Públika hanesan medida esensiál ida atu asegura melloria servisu sira ne'ebé presta ba populasaun.

“Obrigatóriu reforma ba funsionáriu sira ne'ebé mak ho idade 60, ida-ne'e atu loke dalan ba sira ne'ebé iha ona sistema laran foinsa'e sira bele kontinua ba leten nomós bele fó espasu para karik rán foun sira atu tama sira bele tama. Maibé ita mós konsidera no anota katak iha prekupasaun balun ho hirak ne'ebé mak tama ona idade reforma sira-nia instituisaun sei presiza”, esplika nia.

Funsionáriu sira idade reforma ona maibé iha instituisaun sei presiza nian, entaun ida-ne'e sira sei tama nafatin iha reforma, maibé ministériu ida-idak bele halo justifikasaun atubele hatama sira iha kontratu la’ós ona iha funsionáriu públiku maibé kontratu, ne'ebé mak ho durasaun renovavel kada tinan to'o iha tinan lima. (*)