“Iha vizita Prezidente Repúblika nian ne'e mós halo konvite ida mai iha Parlamentu Nasionál atu oinsá bele nomea mós reprezentante Bankada ida-idak hodi bele inklui iha delegasaun Prezidente Repúblika nian ba Indonezia”, dehan Sekretária Meza Parlamentu Nasonál (PN), Lídia Norberta, iha PN, kuarta (06/07).

Ba pedidu refere, Prezidente PN mós informa ona ba Líder Bankada sira atu Bankada hothotu prepara hodi nomeia ninia reprezentante.

Maibé ba viajen husi Prezidente Repúblika nian ne'e, Líder Bankada liuhusi reuniaun loron kuarta (06/07) aprova ona ajenda ba loron aban (07/07) ne'ebé sei iha plenária estraordináriu ida atubele deside viajen autorizasaun Parlamentu Nasionál nian ba atividade vizita husi Xefe Estadu nian ba Indonézia.

“Plenária estraordináriu ida aban ne'e atu ko'alia kona-ba autorizasaun Parlamentu Nasionál ba Prezidente Repúblika, ne'ebé mak sei halo vizita de estadu ida ba Indonézia, ida-ne'e mak aban ita sei iha plenáriu, inklui mós ho kestaun sira seluk”, afirma nia.

Iha artigu 8 husi konstituisaun RDTL ne'e dehan katak Prezidente Repúblika mós iha kompeténsia ba relasaun internasionál sira, ne'e siknifika dehan ne'e iha nesesidade.

Maske iha mandatu Prezidente Repúblika anterior ne'e mosu buat balun mak halo fora husi normál no lá tuir konstituisaun maibé situasaun ne'e la siknifika akontese fali ba Prezidente seluk.

Tanba situasaun ne'e haree ba ema ida-idak nia sentidu ba Estadu, dala ruma iha kostura lahanesan tanba kostura balun, dehan laloos no balun dehan loos.

Nune'e buat ne'ebé dalaruma tenke tau iha oin maka Prezidente Repúblika sé de'it atu viajen ba iha rai-liur ne'e la'os tanba nia hakarak maibé ne'e kompromisu estadu nian.

“Dala ruma ba Bankada ida-idak nian lahanesan, iha parte balun dehan laiha no balun dehan sim, ne'e tanba ita haree relevansia ne'e, Prezidente anterior sira to’o iha Prezidente atuál bainhira iha vizita ba rai-liur ida-ne'e importante, agora maneira atu responde mak laloos, maneira ida ne'ebé mak sala”, esplika nia. (*)