“Iha-ne'e ha'u atu ko'alia asuntu ida, liliu uha dia 30 juñu, no 1 ho 2 iha fulan-jullu, udan boot ne'ebé akontese iha parte lorosa'e nian afeta estragu barak liliu ba estrasa públiku sira tanba ne'e difikulta movimentu públiku nian. Ha'u sujere ba Governu karik bele Governu toma resposabilidade ida hodi halo emerjénsia ba fatin sira ne'ebé mak afeta ba estragu sira ne'e”, dehan nia iha plenária Parlamentu Nasionál, tersa (05/07).

Tanba estrada ne'ebé liga husi Vikeké Vila ba Postu Administratvu Uatulari to'o iha Uatukarbau ho kondisaun grave tebes inklui ponte ida iha Uatukarbau nian ne'ebé hetan kotu hodi difikulta komunidade sira atu asesu ba movimentu.

“'Sé ida-ne'e mak Governu la atende lalais, mak udan ruma sei mai tán ou sé la'e tinan oin udan hanesan ne'e repete filafali dala ida mak sei grave totál,' e sei laiha liu movimentu husi munisípiu ba Postu Administrativu sira”, esplika nia.

Kona-ba inundasaun ne'ebé akontese iha postu Uatukarbau hodi halo ponte ida kotu ne'e iha kompaña ida mak dadaun ne'e konsege hadi’a ona atu karreta ho motorizada bele liu filafali.

Maibé komunidade nia natar kuaze 10 ektare ne'ebé besik hela iha ponte hetan estragu totál tanba rai ba taka tomak hotu.

Bainhira laiha solusaun ba populasaun sira-nia natar ne'ebé afetadu mak bailoron sira sei la halo koilleta no sei hasoru hamlaha, tanba ne'e presiza halo identifikasaun atubele halo atendimentu ida iha tempu tuir mai.

“Estrada ne'e la'ós ida-ne'e de'it, kuaze iha Vikeké ne'e grave totál duni, tanba husi Vikeké mai filafali iha Postu Lakluta mós iha kondisaun hanesan, estrada kuaze halo movimentu públiku ne'e paradu, nomós husi Vikeké mai ponte Dilor ne'e tinan ba tinan tiha ona, nia nafatin de'it hanesan ne'e, tanba ne'e repete dala ida tán iha-ne'e, komunidade e povu Vikeké presiza resposta”, afirma nia.

Dadauk estrada ne'ebé liga husi Postu Administrativu Uatukarbau ba Postu Administrativu Baguia, Munisípiu Baukau ne’ebé uluk bele uza motorizada maibé agora labele tanba estrada refere kuaze mota sobu hotu.

“Sé la sala komunidade Uatukarbau halo ona pedidu ida mai Ministériu Obras Públika ho IJE para halo normalizasaun estrada husi Postu Uatukarbau Vila ba Baguia nian, maibé durante ne'e seidauk resposta, ne'ebé udan-boot mai halo gravé liután”, hatutan nia.

Ho ida-ne'e husu ba Ministru Asuntu ba Parlamentar no Komunikasaun Sosiál. Francisco Jeronimo atubele husu tuir pedidu ne'ebé komunidade Uatukarbau entrega ne'e, bele iha resposta ka la'e, tanba komunidade presiza sira-nia tulun atubele halo normalizasaun ba estrada ne'e atu komunidade bele asesu filafali. (*)