Governu Konstitusionál Daualu, moris husi bloku AMP ne’ebé forma husi partidu polítiku tolu mak hanesan CNRT, PLP no KHUNTO.
Mosu kritika husi deputadu KHUNTO relasiona ho lista pendente membru Governu na’in sia (9) ne’ebé envolve membru husi partidu CNRT no KHUNTO ne’ebé to’o ohin loron seidauk konsege hetan solusaun.
Ho nune’e, mosu hanoin husi deputadu KHUNTO katak Governu ne’ebé lidera husi PM Taur “husik de’it” lista pendente atu nune’e PLP bele hetan benefisiu.
Notisia Relevante: KHUNTO Duun VIII Governu Benefisiu de’it PLP
"Ida ne'e laloos. Ha'u hanoin laloos. Laloos tanba sira ne'ebé seidauk tomada pose ne'e, entaun sira ne'ebé agora iha ne'e halo interinamente par dezenvolve atividade, par aban bainrua iha hotu ona entaun ida-idak asume nia funsaun ne'e," dehan Primeiru Ministru Taur Matan Ruak hafoin hasorumalu ho Prezidente Repúblika, Francisco Guterres Lú Olo, Tersa (22/10/2019).
Molok ne’e, Partidu Kmanek Haburas Unidade Nasional Timor Oan (KHUNTO) deklara governasaun daualu ne’ebé lidera husi Primeiru Ministru Taur Matan Ruak benefesia de'it ba Partidu Libertasaun Popular (PLP), tanba okupa hotu kargu sira iha Governu.
Deputada Bankada KHUNTO iha Parlamentu Nasionál Olinda Guterres hatete, politikamente membru Governu ne’ebé seidauk kompletu fó marjin boot liu ba PLP hodi asume pasta hotu iha ministériu ne’ebé loloos ema CNRT ho KHUNTO nian.
"Politikamente membru Governu la kompletu husi KHUNTO no CNRT ne'e, fó marjin boot ba PLP hodi asume pasta hotu ministériu ne'ebé tuir loloos KHUNTO no CNRT nian. Tanba benefisia polítika ne'e fó benefisiu ba PLP de'it. La'ós ba CNRT no KHUNTO," dehan fundadora Partidu KHUNTO ne’e iha PN, Segunda (21/10/19).