“Ohin (04/07) mai partilla hela informasaun ba Primeiru Minstru (PM), Taur Matan Ruak kona-ba sidadaun feto na’in-7 ne'ebé enfrenta probelma iha Abu Dhabi, semana kotuk sira iha ona Jakarta-Indonézia no semana ne'e sira bele to'o fali iha Timor-Leste, ne'e tanba ita-nia diplomata sira servisu maka’as loos, ho Polísia Sentífiku Investigasaun Kriminál (PSIK) no interpol Dubai nian, bele koopera di’ak no ita-nia sidadaun na’in-7, ne'e semana kotuk iha Jakarta ona, iha ona ita-nia embaixada ho ida-ne'e, ha’u mai ko’alia ita-nia PM nia apoiu hodi repatria sira, se bele semana ne'e sira fila ona mai iha sira-nia família”, dehan Julião iha Pálasiu Governu, segunda (04/07).

Tanba atu repatria sidadun feto na’in-7 iha Jakarta-Indonézia mai fali Timor-Leste, MNEK laiha osan atu repatria tanba tuir MNEK nia kalkulasaun presiza tan osan 10 mil hafoin bele repatria sira-na’in-7.

“Ohin ha’u diskuite ho PM hanesan ne'e, husu PM nia apoiu, tanba MNEK laiha osan, atu repatria fila sidadun na’in-7 ne'e, ami halo kalkulasaun mínimu sira na’in 7,  iha Jakarta to'o mai iha Dili, ita presiza 10 mil hanesan ne'e”, esplika nia.

Maske husi Abu Dhabi responde ona, maibé sira repatria fila la presudika ba prosesu kontinuasaun hodi halo investigasaun nune'e hodi buka hatene ajensia ida ne'ebé maka lori sira ba servisu iha Abu Dhabi.

“Ajensia ne'ebé lori, ita iha ona informasaun balun ajensia ne'e iha ne'ebé, se, mas sei iha hela prosesu investigasaun, ne'e Ministériu Públiku nia servisu hodi buka hatene sira ne'e se ita hatene ona ajensia ida ne'ebée mak haruka ona ema ba Abu Dhabi, Malázia no Alemaña ne'e, mas ita seidauk bele publika sai, tanba sei hein Ministériu Públiku”, hatete nia. (*)