Tuir informasaun ne’ebé www.tempotimor.com asesu iha pájina MAE, segunda (04/07) katak, Ministru Administrasaun Estatal (MAE), Miguel Pereira de Carvalho, sai hanesan Inpsetór ba Serimónia de Içar da Bandeira iha Komemorasaun Aniversário Municipiu Aileu ba dala-49 ne'ebé realiza iha kampu sabraka laran Munisipiu Aileu.

Iha komemorasaun ne’e, Ministru Miguel hodi Governu Konstituisionál daualu fó parabéns ba povu tomak iha Munisípiu Aileu, primeiru ba desizaun ne’ebé sira foti hodi deside dia 1 de Julho hanesan loron estabelesimentu Konsellu Aileu.

Tanba iha loron 1 Jullu 1973, liuhusi desizaun ne’ebé mak fó sai Governu portugueza iha tempu ne’eba hafahe Aileu, enkuantu hanesan parte ida husi Dili hodi sai hanesan Konsellu Nasionál.

“Ha’u kontente teb-tebes tanba Konsellu kunsultivu Munisipál Aileu ninian deside loron ida-ne’e sai hanesan loron ne’ebé mak sira hakarak festeza hamutuk wainhira iha tinan 49 ba kotuk hari’i Konsellu ida-ne’e, hanesan ao longo de periodo ida husi 1975 rezistente iha Aileu hanesan Distritu ida iha tempu Indonézia, no kontinua husi aprovasaun lei divizaun administativu teritóriu sai hanesan Munisípiu ida kontinua eziste nafatin, ida-ne’e hau hakarak fó parabens ba populasaun sira tomak liliu Administradór Munisipiu no Komisaun Organizadora sira halibur populasaun no komponente sira hothotu iha Munisípiu Aileu atu selebra, hau hato’o sentidu kontente husi VII Governu Kontituisionál ba inisiativa ida-ne’e”, hatete Ministru Miguel.

Ho iInisiativa ida-ne’e importante tebes, bele replika mós iha Munisípiu sira seluk iha tempu sira hanesan ne’e haree ba ema hothotu la’ós de’it ba Autoridade Lokál, maibé Autoridade Komunitária sira, populasaun sira, eventu ne’ebé mak wainhira ema partisipa barak iha Aileu sente katak pertense ba loron istoriku no loron importante ida-ne’e.

“Ha’u hodi VII Governu kontituisionál nia naran ha’u hakarak parabeniza sira hotu no kontinua enkoranze ita-nia populasaun iha Aileu para iha futuru bele organiza nafatin selebrasaun sira ba loron importante ida-ne’e iha forma ida hanesan agora ou di’ak liután”, afirma nia

Iha biban ne'e mós Ministru MAE nu’udar reprezenta Governu Konstitusionál sqdaualu halo Lansamento Dahuluk Programa Mão de Obra Postu Administrativu (PMOPA) 2022 iha Postu Aileu Villa ho objetivu atu kria kampu servisu informal ba komunidade sira hodi kontribu rendimentu finanseira; mellora kondisaun servisu Postu Administrativu sira; fó kbi'it ba Administrasaun Postu hodi bele atende nesesidade urgente sira ne’ebé liga ho ijiene; seguransa ambientál, florestal, infrastrutura rurál; Kontribui ba dezenvolvimentu Postu Administrativu ne’ebé durante ne’e ‘ladún hetan atensaun’; Kontribui ba rekoperasaun ekonómiku; Kontribui ona ba preparasaun desentralizasaun administrativa; no sai biban ba autoridade postu administrativu pro-ativu liu ba nesesidade prioritoriu sira.

Tanba bazeia ba polítika no estimasaun husi alokasaun millaun $7,2 iha 2022, estimativa tékniku liuhusi Postu Administrativu iha teritóriu laran sei realiza atividades hamutuk 3.353 atividade no sei enkarega traballadór informál ema 67.059.

Iha mós atividade asinatura plaka iha ámbitu Komemorasaun loron Kriasaun Konsellu Aileu husi Administradór Munisipiu Aileu ne’ebé akompaña husi Ministru Administrasaun Estatál, Diretór Jerál Dezenvolvimentu Rurál, Komandante PNTL Munisípiu Aileu, Sekretáriu Munisípiu Aileu, Administradór Postu, Xefe Suku, no li’an-nain.

Eventu ne'e hetan partisipasaun maximu husi populasaun Aileu inklui Deputadu balun, Administradór Munisípiu Aileu, Sekretáriu Munisípiu, Komandante PNTL Munisípiu Aileu hamutuk ho Ekipa PNTL Munisípiu Aileu, Amu Paroku, Diretór Jerál Dezenvolvimentu Rurál, Diretór Jerál STAE, Diretór Jerál Administrasaun Finansas, Xefe Gabinete Ministru MAE, Sekretáriu Ezekutivu PNDS, Diretora UPCICE, Administradór Postu no Xefe Suku sira, nain Veteranu sira, Lian-na’in, estudante sira nomós husi grupu arte marsiál. (*)