“Iha kritéria balun hanesan, labele fila ba halo uma fatin ne'ebé dezastre akontese ona, labele ba halo uma iha fatin risku dezastre akontese iha futuru mai, rai la'ós ninian tenke iha desizaun husi tribunál ka terras propriedade, se rai protejidu sei la fó rekoperasaun”, dehan Ismail da Costa Babo, iha edifísiu APS, Kaikoli, Dili, kuartu (29/06).

Tanba Protesaun Sivil sei tau importante ba servisu hamutuk ho parte kompetente sira, atu fó hanoin ba komunidade sira ne'ebé hela iha fatin risku, atu fó solusaun.

“Husu ba komunidade sira atu voluntáriu servisu hamutuk ho Governu, Estadu no kompetente tomak atu fó solusaun ba fatin risku ne'ebé iha, atu reduzidu ba risku iha futuru labele akontese tan hanesan tinan kotuk”, afirma nia.

Protesaun sivil sei halo sosializasaun ba komunidade sira, kona-ba fatin risku dezastre nian, presaun husu komunidade sira tenke hadook-an husi fatin risku no dezastre antes.

“Ita-nia lei fó ona dalan ba protesaun sivíl atu regula, iha artigu 20 kona-ba utilizasaun rai, depois dekretu-lei 7 Governu deklara ona fó kompeténsia ba protesaun sivíl, hodi fó apoiu rekoperasaun”, dehan nia.

Governu rekoñese fó rekopersaun ba vítima dezastre naturál sira maibé iha kritéria balun mak tenke tau atensaun, hanesan komunidade labele fila ba halo uma iha fatin ne'ebé dezastre akontese ona.

Nune’e fó hanoin ba públiku katak labele ba halo uma tan iha fatin ne'ebé perigu ba ema nia vida, labele halo uma  iha mota ninin hanesan rai protejidu Tasitolu, mota Komoro no iha fatin ne'ebé risku Governu bandu

“Ami husu vítima ne'ebé daudaun hela iha sentru evakuasaun atu banati tuir família balun ne'ebé sira daudaun fila ba sira-nia munisípiu, para bele hela iha área seguru”, katak nia.

Iha ne’e, Protesaun sivíl prontu apoiu vítima sira fó materiál konstrusaun uma nian, apoiu transporte mobiliza sira ba fali sira-nia munisípiu orijen, hodi asegura ba futuru labele akontese tan dezastre. (*)