Deputada Bankada KHUNTO iha Parlamentu Nasionál Olinda Guterres informa, partidu KHUNTO prepara ona ninia ema hodi troka kandidatu membru governu na’in rua ne’ebé tama iha lista pendente.
"KHUNTO hakarak troka lalais nia ema ne'ebé la hetan posse husi Prezidente Repúblika (PR), tanba ne'e KHUNTO Prepara ona nia ema na'in rua. Tanba ne'e husu ba Primeiru Ministru (PM) atu aprezenta lista ne'e ba PR, atu bele fó posse ba membru na'in rua ne'ebé preparadu ona," deklara deputada ne’e iha plenaria PN, Segunda (21/10/2019).
Nia dehan, KHUNTO iha promesa ba públiku atu lori nia membru governu sira hodi halo juramentu iha Ramelau, maibé promesa ne’e seidauk bele realiza tanba ninia ema iha governu seidauk kompletu.
"Iha tempu kampaña konsileiru másimu KHUNTO deklara katak atu ba halo juramentu iha Ramelau, tanba ne'e ha'u sei ba Primeiru Primeiru (PM) hodi lori ami-nia ema ne'e ba PR hodi nune'e bele ba halo juramentu iha Ramelau," deklara Olinda.