“Ladún furak ida wainhira ita-nia Governu iha, inan aman mós la aproveita ida-ne'e, ba ko'alia iha ita-nia Governu, agora husi kotuk tanba de'it ema ne'e fasilita ita-nia oan sira entaun inan aman sira mós husik, ha'u mós hirus sira. Ha'u ko’alia nune'e, maibé la buat ida, ita-nia alin sira ba hotu ona iha ne’eba ho ajensia ida ne'ebé mak nia hahalok hanesan ne'e”, dehan nia iha plenária PN, segunda (27/6).
Ho preokupasaun ida-ne'e maka Bankada KHUNTO hanoin katak ajénsia sira ne'ebé mak lori joven timoroan sira ba Portugal ne'e Polísia Sientífika no Investigasaun Kriminal (PSIK) atu buka kaptura no loke investigasaun ba sira.
Tanba bankada KHUNTO mós hetan informasaun ida katak ajensia ne'ebé mam fasilita joven sira ne'e agora dadauk hela iha Metiaut, ne'ebé mak kobra orsamentu ho montante rihun $3 kada ba joven sira ne'ebé mak hakarak ba servisu iha rai liur.
“Kobra labarik sira ne'e kada joven ida osan rihun 3, para fó ba ajensia ne'e hodi nune’e fasilita sira ba servisu iha Portugal, maibé to’o tiha iha Portugal ne'eba labarik sira ne'e servisu laiha, osan menus, tanis ba tanis, inan aman iha ne'e mós tanis e sira mós ba ne'eba tanis”, afirma nia.
Tanba ne'e ejize ba PSIK atu diretamente ba kaer ema ne'e iha fatin ne'ebé mak deskonfia, nune'e kaer sira atu toma responsabilidade ba joven sira ne'ebé haruka ba Portugal.
Ba kestaun ne'e, Ministru ba Asuntu Parlamentár no Komunikasaun Sosiál (MAPKomS), Frsncisco Martins da Costa Pereira Jerónimo hatete, kona-ba joven feto sira ne'ebé mak dadaun ne'e preokupadu hela iha rai liur, ida-ne'e Ministériu Negósiu Estranjeiru no Kooperasaun (MNEK) informa ona ba Embaisada Timor-Leste iha Portugál atubele buka no tau atensaun nafatin.
“Kona-ba joven sira ba rai liur, iha semana hirak liu-ba ami halo ona esplikasaun ida katak sira ne'ebé mak oras ne'e iha Portugal Ministériu Negósiu Estranjeiru no Kooperasaun informa ona ba Embaisada, e halo ona servisu hodi buka tuir alin sira ne'ebé mak ba halo servisu mais ba la servisu e oras ne'e sira preokupadu iha ne'ebá entaun embaisada sei fó atensaun nafatin ba sira”, dehan nia. (*)