“Ha'u hakarak hato'o preokupasaun liliu ba ita-nia administradór munisípiu Covalima ne'ebé mak halo karta ida ba funsionáriu kontratadu ida ne'ebé derepente de'it hasai justifikasaun ida e hasai tiha ita-nia funsionáriu ida-ne'e”, dehan nia iha plenária Parlamentu Nasionál (PN), segunda (27/06).

Tanba sidadaun ida ne'ebe sai hanesan funsionáriu kontratadu iha BTL Covalima, durante ne'e hala'o servisu di'ak los, derepente hetan ejonera husi administradór munisípiu no laiha justifikasaun ruma ba nia hahalok ruma.

“Agora funsionáriu ne'e nia halo ona karta ida parese aban (28/06) sira ne’e, nia sei hato'o mai iha PN”, afirma nia.

Ho preokupasaun ne'e, CNRT husu ba Ministériu Administrasaun Estatal (MAE) atu haree halo investigasaun ida ba aktu husi Administradór Munisípiu Covalima, ne'ebé nia halo hasoru funsionáriu ida ne'ebé durante ne’e hala'o servisu di'ak hela.

Maibé, Deputadu Bankada FRETILIN, Alexandrino Cardoso hatete, kona-ba funsionáriu kontratadu ne'ebé mak parte administrasaun munisípiu Covalima hapara ne'e tanba ho rajaun funsionáriu refere nia kontratu sei termina iha loron 30 juño 2022.

“Ha’u hakarak hato’o de'it informasaun balun liga ho intervensaun deputadu José Virgilho (Agio) nian ne'ebé mak kestiona kona-ba funsionáriu ida ne'ebé mak administradár Munisípiu Covalima hapara, ne'ebé servisu iha BTL, nia la'ós pur hapara de'it maibé tuir informasaun ne'ebé mak ha’u hetan dadauk katak sira-nia mandatu ne'e termina duni iha dia 30 de junho agora”, informa nia.

Dadauk Administradór Munisípiu Covalima mós labele atu renova hikas funsionáriu nia kontratu tanba durante iha ninia prestasaun servisu ne'e administrasaun selu de'it ho orsamentu bens servisu no laiha saláriu ba nia.

“Tanba ne'e mak administradór hapara sira-nia kontratu ne'e tanba termina ona dia 30 junho”, afirma nia. (*)