Tempotimor (Dili)-Ministru Finansas, Rui Gomes hamutuk ho Koordenadór Rezidente Nasaun Unidas, Roy Trivedy no Xefe Misaun IOM Timor-Leste, Ihma Shareef, lansa ona Polítika Nasionál envolvimentu Diáspora no Estratéjia Mobilizasaun Remessa.

Tuir informasaun ne’ebé www.tempotimor.com asesu iha pájina MF, kinta  (23/06) katak, Polítika no Estratéjia ne’e mak hanesan dokumentu importante ida ne’ebé mak produz ba dahuluk iha Timor-Leste ho apoiu husi Organizasaun Internasionál ba Migrasaun (IOM), ne’ebé mak hola parte iha Programa Konjuntu Nasoins Unidas hanaran Kuadru Finansiamentu Nasionál Integradu (INFF,), finansia husi Fundu Konjuntu Objetivu Dezenvolvimentu Sustentavel.

Objetivu prinsipál husi dokumentu importante ne’e mak atu fornese orientasaun balun ba Governu Timor-Leste, parseirus internasionál no parte interessada sira seluk relasiona ho migrante no komunidade Timoroan ne’ebé hela iha nasaun barak iha mundu.

Depoisde restaurasaun independénsia, remessa arrekada husi traballadór Timoroan sira iha Reinu Unido, Austrália no Koreia Súl, importante tebes ba Timor-Leste nia ekonomia.

Iha tinan 2018, remessa husi komunidade Timoroan ne’ebé servisu iha estranjeirus mak país nia maior fonte reseita esterna, depoisde petróleu.

Nune’e mós iha tinan 2021, remessa diáspora mak segundu maior fonte reseita depoisde petróleu no gás, reprezenta 8,7% husi produtu internu brutu la’ós-petróleu.

Entre tinan 2013 no 2020, remessa husi traballadór Timoroan ne’ebé servisu iha estranjeirus sa’e dubru, husi millaun $34 ba kuaze millaun $150 iha 2020. Iha tinan 2021, remessa diáspora atinje millaun $170. Tambá ne’e, Remessa diáspora importante tebes atubele ajuda Governu diversifika ekonomia.

“Ha’u haree remessa diáspora ne’e hanesan oportunidade ida atu diversifika ekonomia no fonte reseita nasionál liuhusi esplora no introdus títulus (𝘥𝘪𝘢𝘴𝘱𝘰𝘳𝘢 𝘣𝘰𝘯𝘥) ho maturidade tempu badak no médiu ne’ebé iha potensia hodi finansia setór ekonomia importante sira inklui turizmu, agrikultura, saúde no edukasaun”, dehan Ministru Rui Gomes iha nia Diskursu Abertura iha serimónia lansamentu Polítika no Estratéjia importante ne'e. (*)