Tuir informasaun ne’ebé www.tempotimor.com asesu husi MAPKOMS, kuarta (22/06) katak, Ministru Francisco Jerónimo esplika, objetivu husi diálogu komunitáriu ne’e atu esplika programa ne’ebé Governu presiza atu halo, saida mak halo ona, nune’e mós bele rona direta komunidade sira nia preokupasaun iha moris loroloron iha asuntu oioin nu’udar nesesidade bázika.
“Ohin ha’u mai hamutuk ho Ministru ba Asuntus Kombatentes no Libertasaun Nasionál hodi, Meta Malik, tanba ha’u hatene katak Leimea Kraik hanesan knu’uk ba veteranu sira, nune’e imi bele husu direta informasaun kona-ba verifikasaun dadus veteranu nian, nune’e mós iha Vise-Ministru Administrasaun Estatál (MAE), Lino Torrezão, atubele halo diálogu ho ita-boot sira kona-ba asesu infraestrutura hanesan, uma kbi’it la’ek, bee-moos no seluk tan”, dehan Ministru Francisco.
Iha mós objetivu prinsipál mak ho programa Governu iha Povu nia Le’et, sei hari’i Sentru Informasaun Suku Rurál nune’e bele esplora potensialidade iha suku Leimea, liliu fatin turístiku hanesan iha bee manas nomós iha bee morna ne’ebé bele kontribui ba reseita doméstika iha família, tempu tuir mai, “ekipa téknika sei prodús programa perfíl suku Leimea nian hodi publika iha kanál RTTL atu públiku bele asesu no koñese paizajen furak iha fatin ida ne’e”, nune’e bele atrai vizitór lokál no mós internasionál.
Administradór Postu Hatulia, Luis Manuel agradese ba MAPKOMS tanba bele to’o direta iha fatin refere hodi rona rasik komunidade Leimea nia lian, maski ho kondisaun estrada ne’ebé susar atu asesu.
Partisipa iha diálogu ne’e, Reprezentante SEKOOP, Diretór Jerál Ministeriu Saúde, Komandante PNTL Munisípiu Ermera, reprezentate Xefe Gabinete MAPKOMS, Gabinete Inspesaun Jerál MAPKOMS, Diretór Diresaun Nasionál Diseminasaun Informasaun (DNDI), Diretór Nasionál Administrasaun no Finansas (DNAF), Diretór Nasionál Promosaun no Dezenvolvimentu Media Lokál (DNPDML), Koordenadór CEFTEC, ekipa téknika MAPKOMS nian inklui mós hetan partisipasaun másima husi komunidade no estudante. (*)
