“Ha’u aseita ho sistema ida uluk di’ak liu banku mak lori karreta hodi ba selu ita-nia idozu sira iha nia fatin, iha suku tuir sira ba selu iha ne'eba duke sira mak sei mai fali iha banku entaun kuitadu ho sira-nia situasaun saúde sei fó difikuldade ba sira”, dehan Deputadou Fabiano de Oliveira iha Plenária Parlamentu Nasionál, segunda (20/06).

Tanba ne’e, rekomenda ba Governu liliu Ministériu Solidariedade Sosiál atu haree koordena mós ho sira iha munisipal inklui Rejiaun Administrasaun Espesiál Oekussi-Ambeno (RAEOA).

“Ne’e mak ha’u hanoin rekomenda atubele toma konsiderasaun ida-ne’e atu di’ak liu banku mak ba selu ita-nia idozu sira ba tuir sira to’o sira-nia uma atu selu sira eh ba suku”, dehan nia.

Haree mós katak orsamentu ne'ebé Parlamentu aprova iha tinan hasa'e ba $50.00 kada fulan, entaun presiza iha rejistu foun ba idozu foun sira.

“Ha’u hanoin ministériu relevante ho diresaun sira iha munisípiu tenke rigorozu para halo servisu tanba tinan ne’e foin 50 e tal hakarak atu katuas lalais para simu osan entaun ba falsifika dokumentu tanba ne’e mak presiza haree mós ida-ne’e”, haktenik nia. (*)